Энэтхэг-Хятадын хилийн мөргөлдөөний үеэр Энэтхэгийн гурван цэрэг амь үрэгджээ

Энэтхэг-Хятадын хилийн мөргөлдөөний үеэр Энэтхэгийн гурван цэрэг амь үрэгджээ

Энэтхэг-Хятадын хилийн маргаантай бүс нутаг Кашмирийн Ладакт өнөөдөр мөргөлдөөн гарах үеэр Энэтхэгийн цэргийн гурван алба хаагч амь үрэгдсэн тухай тус улсын батлан хамгаалах яам мэдээлжээ. Хоёр улсын армийн өндөр албан тушаалтнууд одоо нөхцөл байдлыг намжаахаар хэлэлцээ хийж байгааг мөн мэдээлсэн байна.

Хятадын тал мэдээлэхдээ Энэтхэгийн цэргүүд хил давж, цэргүүд рүү нь довтолсон гэж буруутгажээ. Хятадын талаас хүний амь хохироогүйг тус улсын гадаад хэргийн яам баталсан байна.

Сүүлийн өдрүүдэд хоёр улсын хилийн маргаан зөрчил хурцдаж, талууд энэ бүс нутагт цэргийн хүчээ бөөгнөрүүлээд байв.

Өнөөдрийн үйл явдал нь 1962 онд болсон богино хугацааны дайнаас хойш хүний амь хохирсон анхны тохиолдол болж байна. Энэтхэг улс өөрийнх нь газар нутгийн 38,000 км.кв хэсгийг булаан эзэлсэн гэж хөрш Хятадыг буруутгадаг. Сүүлийн 30 гаруй жил талууд олон удаа хэлэлцээ хийсэн ч маргаанаа шийдвэрлэж чадаагүй байгаа. Өнгөрсөн сард хоёр улсын бас нэг хилийн маргаантай бүс нутаг болох Сиккимд хилийн цэргүүдийн хооронд зодоон болж байв. 2017 онд энэ бүсэд Хятадын тал авто зам тавих гэснээс үүдэлтэй бас нэг мөргөлдөөн болж байжээ.