БНСУ-ын Сөүл хотын Гымчон дүүрэгт байрлах хүнсний үйлдвэрт ажиллаж байсан манай улсын таван иргэн болон тэдэнтэй харилцаанд орсон гурван иргэн коронавирусийн халдвар авсан болох нь өчигдөр /2020.08.27/тогтоогдсон байна. Иргэдийн биеийн байдал хэвийн,байгаа бөгөөд холбогдох байгууллагын туслалцаа дэмжлэгийг авч байгааг Монгол Улсаас БНСУ-д суугаа ЭСЯ-аас мэдээлсэн байна.
Халдвар авсан монголын иргэдтэй шууд болон дам байдлаар хавьтсан иргэдийг олохоор ажиллаж байгаа бөгөөд тэний явсан маршрутыг суугаа орны холбогдох байгууллагаас тодруулахад халдвар авсан нэг иргэн энэ сарын 12-ны өдрийн үдээс хойш Консулын хэлтсээр үйлчлүүлсэн байна.
Иймд тус өдөр Консулын хэлтсээр үйлчлүүлсэн иргэд халуурах, ханиалгах, хоолой өвдөх зэрэг ямар нэгэн шинж тэмдэг илэрч байгаа бол ойр байрлах эрүүл мэндийн байгууллагад хандахыг зөвлөж байна.
Манай иргэд хамгийн ихээр оршин суудаг Сөүл хот болон Кёнги мужийн бүс нутагт коронавирусын дэгдэлт эрчимтэй нэмэгдсэн хэвээр байна. Иймд БНСУ-ын Засгийн газраас гаргасан журмын дагуу бүлэг бөөгнөрөл үүсгэхгүй байх, хөдөлгөөнөө хязгаарлах, хувийн зай барих зэрэг өвчнөөс урьдчилан сэргийлэх арга хэмжээнүүдийг чанд хэрэгжүүлж, эрүүл мэнддээ анхаарахыг хүсье.
