Д.Тогтохсүрэн: Өрх бүрт нэг сая төгрөг өгөх Ерөнхийлөгчийн санаачилгыг дэмжээгүй, дахин хэлэлцэнэ

2021-01-18 15:39

Д.Тогтохсүрэн: Өрх бүрт нэг сая төгрөг өгөх Ерөнхийлөгчийн санаачилгыг дэмжээгүй, дахин хэлэлцэнэ

УИХ дахь МАН-ын бүлэг өнөөдөр /2021.01.18/ цахимаар хуралдаж, хоёр асуудал хэлэлцсэний нэг нь Ерөнхийлөгч Х.Баттулгаас УИХ-д өргөн барьсан “Өрх бүрт нэг сая төгрөг”-ийн тэтгэлэг олгох бодлого, арга хэмжээг хэрэгжүүлэх “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” УИХ-ын тогтоолын төсөл байв. 

Тэгвэл уг тогтоолын төслийг хэлэлцэж гишүүдийн олонх нь холбогдох байнгын хороогоор хэлэлцүүлэх нь зүйтэй гэж үзсэн хэмээн МАН-ын бүлгээс өмнө нь мэдээлсэн. Гэтэл уг мэдээллийн дараа тун удалгүй тус бүлгийн дарга Д.Тогтохсүрэн хэвлэлийнхэнд мэдээлэл өгч "Тогтоолын төслийгдахин сайн нягталж хэлэлцэх шаардлагатай гэж МАН-ын бүлгээс үзсэн. Ямар ч шийдвэр гаргаагүй" гэж хэлэн өмнөх мэдээллээ үгүйсгэлээ. 

Тодруулбал тэрбээр "МАН-ын бүлэг Ерөнхийлөгчийн санаачилсан "Өрх бүрт нэг сая төгрөг олгох" тогтоолын төслийг дахин хэлэлцэх шаардлагатай л гэж үзсэн. Түүнээс хойшлуулаагүй, дэмжсэн, дэмжээгүй гэж гэдэг шийдвэрийг гаргаагүй. Санхүү, эдийн засгийн тооцооллыг сайн хийх хэрэгтай, Засгийн газрын саналыг сонсох ёстой. Оффшороос мөнгө орж ирсэн, ирээгүйг мэдэх шаардлага бий. Ялангуяа, АТГ, прокурорын байгууллагаас асууж, тодруулах зүйл байна гэж үзсэн. УИХ-ын болон Дэгийн тухай хуулиар ийм тогтоолын төслийг хууль, зүйд нийцэж буй эсэхийг авч үзэх ёстой юм байна гэж үзсэн. Судлаад, санал боловсруулж дахиж бүлгийн хурлаар яриад байнгын хороогоор хэлэлцээд явах ёстой гэж үзсэн" гэлээ.  

2021-01-18 13:11

МАН-ЫН БҮЛЭГ: Өрх бүрт сая төгрөг өгөх Ерөнхийлөгч Х.Батулгын санаачилсан тогтоолын төслийг дэмжинэ

УИХ дахь МАН-ын бүлэг өнөөдөр /2021.01.18/ цахимаар хуралдаж, хоёр асуудал хэлэлцлээ. Цахим хуралдааныг Бүлгийн дарга Д.Тогтохсүрэн даргалж, хуралдааны эхэнд Монгол Улсын Ерөнхийлөгч Х.Баттулгаас УИХ-д өргөн барьсан “Өрх бүрд нэг сая төгрөг”-ийн тэтгэлэг олгох бодлого, арга хэмжээг хэрэгжүүлэх “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” УИХ-ын тогтоолын төслийг авч хэлэлцлээ.

Бүлгийн гишүүд уг тогтоолын талаар санал бодлоо хэлж, гишүүдийн олонх нь холбогдох байнгын хороогоор хэлэлцүүлж, ярих нь зүйтэй гэж үзлээ.

Хоёрдугаарт, МАН-ын бүлэг яамдын хэрэгжүүлэх бодлого, арга хэмжээний талаархи танилцуулгыг шат дараатай сонсч, санал бодлоо хэлж байгаа. Энэ хүрээнд Соёлын сайд С.Чулуун өнөөдөр яамны хэрэгжүүлэх бодлогын зорилт, хөрөнгө оруулалт, салбарын томоохон төслүүдийн талаар танилцуулсан юм. Тодруулбал, “Алсын хараа-2050” урт хугацааны хөгжлийн бодлогын зорилтод тулгуурлан Төрт ёсны уламжлал, түүх, соёлын дурсгал, утга зохиол, урлагийн бүтээлээр Үндэсний бахархал төлөвшүүлж, эх оронч үзэл, эв нэгдлийг нэвтрүүлнэ. Мөн Засгийн газрын 2020-2024 оны үйл ажиллагааны хөтөлбөрийн хүрээнд “Бүх нийтийн соёлын боловсрол” , “Цахим соёл”, “Монгол ба дэлхий дахин” хөтөлбөрүүдийг шинээр боловсруулж хэрэгжүүлэхээр тусгажээ. Харин өмнөх хэрэгжүүлж байсан төсөл хөтөлбөрүүдээс “Монгол уран бүтээл” /2015-2025/, “Соёлын биет бус өвийг хамгаалах” /2019-2023/, “Баримтат өвийг хамгаалах” /2014-2024/ төсөл хөтөлбөрүүдийг үргэлжлүүлэн хэрэгжүүлэх юм байна.

Түүнчлэн Соёлын тухай хуулийн шинэчилсэн найруулга, Кино урлагийг дэмжих тухай, Музейн тухай хуулийн төслүүлийг хэлэлцэн баталснаар салбарын эрх зүйн орчин сайжирч, үйл ажиллагаанд өндөр ач тустайг салбарын сайд онцоллоо. Мөн бодлогын зорилтод тулгуурлан Үндэсний болон сонгодог урлагийн мэргэжлийн ур чадвар бүхий нарийн мэргэжлийн боловсон хүчнийг бэлтгэх, тэтгэлэг дэмжлэг олгох, төр олон нийтийн түншлэлийн харилцааг өргөжүүлж, урлаг уран бүтээлийг хөгжүүлэх зорилгоор олон төсөл хөтөлбөрийг хэрэгжүүлэхээр үйл ажиллагааны хөтөлбөрт тусгажээ.

Тэгвэл олон улсад зохион байгуулах эвэнтийн тухайд Дэлхийн соёлын сайд нарын чуулга уулзалтыг 2022 онд Монгол Улсад зохион байгуулна. Хүннү болон Монголын эзэнт гүрний түүхийг сурталчлах “Нүүдэлчдийн эзэнт гүрэн” үзэсгэлэнг Европын холбооны улсуудад аялуулах аж.

Соёлын салбарын томоохон бүтээн байгуулалтаас авч үзвэл, “Чингис хаан” хаад, язгууртны музей, Байгалийн түүхийн музей, Үндэсний номын сан, Үндэсний урлагийн их театр, Хөвсгөл нуур музей, соёл мэдээллийн төв, Хүүхдийн номын сан, хүүхдийн театр байгуулахаар тусгаснаа танилцуулав.




С.Амарсайхан дахин ХУДАЛ ярьсан уу

14 цагийн өмнө

Шуурхай мэдээ
Өнөөдөр байнгын хороод хуралдахгүй

14 цагийн өмнө

Шуурхай мэдээ