Өмнөговь аймгийн Цогтцэций сумыг Даланзадгад сумтай холбосон 59,6 км хатуу хучилттай замын ажил бүрэн дуусжээ. Анх 2016 оны дөрөвдүгээр сард тухайн үеийн Засгийн газрын тогтоолоор уг замыг барихаар шийдвэрлэж, гүйцэтгэгч компаниар “Эн Си Эф” ХХК сонгогдсон байдаг.
Улмаар тус компани Аж үйлдвэрийн яамтай концессын гэрээ байгуулан нээлтийн ажиллагаа хийж, техник тоног төхөөрөмжөө байрлуулан бэлтгэл ажлаа хангаж эхэлжээ. Гэвч 2016 оны сонгуулиар Засгийн газар солигдож, гэрээг түдгэлзүүлсэн байна.
Үүний дараа тус замыг стратегийн чухал ач холбогдолтой болохыг дахин тогтоож, 2017 оны 3 дугаар сард “Эн Си Эф” ХХК Үндэсний хөгжлийн газартай гэрээгээ шинэчлэн байгуулж, баталгаажуулжээ.
Ийнхүү засгийн газар солигдсон, зөвлөх компани сонгон шалгаруулах тендер зарлахыг хүлээх гэх мэт асуудлаас замын бүтээн байгуулалтын ажил 2019 оны зургадугаар сард эхэлсэн аж.
Замыг үндсэндээ хоёр жилийн дотор барьж дуусгах байсан ч цар тахлын нөхцөл байдлаас шалтгаалан бага зэрэг хойшилж, энэ онд ашиглалтад ороод байна. Хэдий хугацаа хойшилсон ч уг замын бүтээн байгуулалтын ажил Монголын авто замын салбарын түүхэнд бичигдэж үлдэх ажил болсон. Учир нь 50-иас дээш км замыг 100 хувь дотоодын санхүүжилтээр, нэг ч гадаадын ажилтангүйгээр монгол залуус нэгдэж дуусгасан анхны жишээ нь энэ юм.
Нөгөө талаар уг зам ашиглалтад орсноор байгаль орчин, энэ нутагт нутагладаг малчдын амьдрах орчинд маш том өөрчлөлтийг авчирч байгаа гэж хэлж болно. Тодруулбал, зам баригдахаас өмнө хүнд даацын автомашинууд дураараа давхиж, байгаль сүйдэн, Цогтцэций сумын хойд хэсэгт хүн мал амьдрах нөхцөлгүй болж Шанхын талд нутагладаг байсан зээрийн сүрэг хүртэл дайжжээ. "Харин шинэ зам ашиглалтад байгаль, малын бэлчээр сэргэж, цэлмэг тэнгэр, ногоон талаа харахтайгаа боллоо гэж" 10 гаруй жил том машины тоосонд амьдарсан нутгийн малчид ярьж байна.
Ташрамд дурдахад, энэ бол Таван Толгой, Оюу толгой, Гашуун Сухайтын бүх ачаа тээврийн машинууд дамжин өнгөрөх эдийн засгийн магистрал зам юм. Гүйцэтгэгч “NCF”, “M-Oi”l групп өөр өөрийн чиг үүргээр оролцож, Капитрон банк дэмжлэг үзүүлжээ. Мөн “Шилдэг зам”, “Мотор сервис” компаниудад гэрээт ажлаа чанартай сайн гүйцэтгэсэн юм.
