Хэт өндөр үнэд хяналт тавих журмын төсөл боловсруулах ажлын хэсгийг Шударга Өрсөлдөөн Хэрэглэгчийн Төлөөх Газар (ШӨХТГ)-аас байгуулсан байна. Монгол Улсад 2010 онд баталсан Өрсөлдөөний тухай хуулийн Шинэчилсэн найруулгад зааснаар
- 1.2. Давамгай байдалтай Аж ахуй эрхлэгч бараа бүтээгдэхүүнд үндэслэлгүйгээр хэт өндөр үнэ тогтоохыг хориглоно
- 2. Давамгай байдалтай Аж ахуй эрхлэгч хэт өндөр үнэ тогтоохтой холбоотой журмыг Засгийн газар батална хэмээн тус тус заасан ч өнөөдрийг хүртэл журмыг батлалгүй хяналтгүй явсаар ирсэн юм байна. Иймд тус хуульд заасан Хэт өндөр үнийг хянах журмын төсөл боловсруулах ажлын хэсгийг ШӨХТГ-аас гаргалаа.
Журмын төслийг шуурхай боловсруулж Шадар сайдаар уламжлуулан Засгийн Газрын хуралдаанд хэлэлцүүлэхээр танилцуулах болно. Энэ журам батлагдвал хэт өндөр үнэ гэж ямар үнийг тооцох, ямар тохиолдолд, үндэслэлгүй үнэ нэмсэн гэж тооцох, түүнд авах арга хэмжээ зэрэг нь тодорхой болж, хяналт тавих эрх зүйн орчин бүрдэх юм.
Дэлхий дахинд цар тахал, Орос Украины дайнаас үүдэлтэй хүнс, бараа, түүхий эдийн хомсдол үүсэж, үнэ тасралтгүй өссөөр байна. Үүний эсрэг дэлхийн улс орны Засгийн газрууд өөр өөрийн хэмжээнд арга хэмжээ авч, зохицуулалтууд хийсээр байна. Монгол Улсын Засгийн газраас үнийн өсөлтийг хязгаарлах зорилгоор дизель түлшний онцгой татвар, Хүнсний гол нэрийн бараа бүтээгдэхүүний гаалийн татварыг тэглэсэн хэдий ч валютын хомсдол, барааны татан авалт, түүхий эд, бараа материалын тээвэрлэлтийн удаашралаас үүдэлтэй үнийн өсөлт зогсохгүй байгаагийн хажуугаар олон улсад монополи, давамгай байдалтай аж ахуй эрхлэгчид үнэ хөөрөгдөж, хэт их ашиг олох явдал гарсаар байна.
Үүний эсрэг авч хэрэгжүүлж буй олон улсын туршлагыг судлахад Европын холбооны улсууд болон Их Британи, ОХУ, Турк , Казахстан, Беларусь, Чили, Армени, Энэтхэг зэрэг орнууд давамгай байдалтай аж ахуй эрхлэгч хэт өндөр үнэ тогтооход хяналт тавих хууль, журам мөрдүүлж арга хэмжээ авч ажиллаж байна хэмээн мэдээллээ.
Эх сурвалж: ШӨХТГ
