Энэ наймдугаар сарын 05-ны өдөр /2022.08.05/ Зэвсэгт хүчний 327 дугаар ангид хугацаат цэргийн алба хааж байсан байлдагч Х нь Хэрлэн голын усанд осолдож амь насаа алдсан харамсалтай хэрэг гарсан билээ.
Тэгвэл энэ талаар ЗХЖШ-ын хэвлэл мэдээллийн албанаас мэдэгдэл гаргажээ. Үүнд, “Зэвсэгт хүчний 327 дугаар ангид хугацаат цэргийн алба хааж байсан байлдагч Х нь 2022 оны 8 дугаар сарын 5-ны өдөр Хэрлэн голын усанд живсний улмаас харамсалтайгаар амь насаа алдаж, бидэнд нөхөж баршгүй уй гашуу тохиолоо.
Талийгаачийн нас барсан шалтгаан, нөхцөлийг тодруулахаар Дорнод аймгийн Цагдаагийн газар, хууль хяналтын байгууллагууд шалгаж байгаа бөгөөд Зэвсэгт хүчний Жанжин штабаас томилогдсон ажлын хэсгийн бүрэлдэхүүн Зэвсэгт хүчний 327 дугаар ангид албаны шалгалт явуулж байна.
Хууль хяналтын байгууллагуудаас өгсөн зөвлөмжийн дагуу уг хэргийг шалгаж дуусах хугацаанд Зэвсэгт хүчний Жанжин штаб болон Зэвсэгт хүчний 327 дугаар ангийн захирагч, удирдах албан тушаалтнуудаас хэвлэл мэдээллийн ажилтнуудад нэмэлт тайлбар, мэдээлэл өгөх боломжгүй юм. Зэвсэгт хүчний Жанжин штаб болон Зэвсэгт хүчний 327 дугаар ангийн захирагч, удирдлага, холбогдох албан тушаалтнууд энэ өдрүүдэд ажиллаж, шаардлагатай бүхий л арга хэмжээг хэрэгжүүлсээр байна” гэжээ.
