Халдашгүй байдлын дэд хороо УЕП-оос өгсөн хүсэлтийн дагуу УИХ-ын гишүүн Н.Номтойбаярын бүрэн эрхийг түдгэлзүүлэх эсэх асуудлаар хуралдав.
Ингээд Ч.Улаан гишүүнийг гадаад дахь томилолтоо дуусгаад маргааш ирсэн үед нь хуралдахаар шийдвэрлэлээ.
Энэ талаар УИХ-ын гишүүн Ц.Нямдорж "Ч.Улааныг ирэхээр хуралдахаар тохироод тарлаа. Маргааш хуралдана. Халдашгүй байдлын дэд хорооны гишүүд бүгд байж нэгдсэн санал шийдвэр гаргана" гэсэн юм.
Улсын ерөнхий прокуророос УИХ-ын гишүүн Н.Номтойбаярын бүрэн эрхийг түдгэлзүүлэх хүсэлтийг өнгөрсөн долоо хоногийн пүрэв гаригт /2020.01.16/ УИХ-д ирүүлсэн. Ингээд Халдашгүй байдлын хороо хуралдаж дээрх асуудлыг хэлэлцэх гэсэн боловч ирц бүрдээгүй гэх шалтгаанаар хойшлоод байгаа юм.
Тус хороонд УИХ-ын гишүүн Ц.Нямдорж, Н.Энхболд, Ө.Энхтүвшин, Ч.Улаан, Д.Лүндээжанцан нарын таван гишүүн харъяалагддаг юм.
