Төр нийгмийн нэрт зүтгэлтэн Г.Батхүү агсны ар гэр болоод тус хэргийн өмгөөлөгч Ж.Батхуяг нар хэвлэлийн хурал хийх үеэрээ 13 секунтын бичлэгийн тухай мэдэгдсэн.
Тэд мэдээлэлдээ, “Хэргийг шалгах явцад нэр бүхий этгээд хэргийн талаар мессеж бичсэн. Тухайн этгээд “Би харсан. Надад 13 секунтын бичлэг байгаа. Мэдээллийг шалгах явцад нэг хүн тогтоогдсон. Тэр хүн “Энэ хэргийн талаар мэдэхгүй” гэсэн бөгөөд өөр хэрэгт шалгагдаад байгаа юм билээ” хэмээн мэдэгдсэн. Мөн гар утсанд ирсэн мессежийг олон нийтэд хүргэсэн.
Тэгвэл дээрх хэрэгтэй холбоотойгоор Мөрдөн байцаах албаны Онц хүнд гэмт хэрэгтэй тэмцэх тасгийн дарга, дэд хурандаа П.Эрдэнэбилэг мөн л мэдээлэл хийсэн. Тэрбээр “хохирогчийн ар гэрийнхэнд нь 13 секунтын бичлэг байгаа гэсэн мэдээлэл тарсан. Үүнийг шалгаж үзэхэд Г.Батхүү агсны ар гэрийхэнд нь 13 секунтын бичлэг хуурамчаар зохиож зориудаар өгч 15 сая төгрөг залилсан хэргийг илрүүлсэн. Мөн иргэн Г гэгч Г.Батхүү агсны хэргийн бичлэг хуурамчаар хийснээс гадна зургаан удаагийн үйлдлээр бусдаас 260 сая төгрөг залилан мэхлэх хэрэг үйлдсэнийг яллах дүгнэлт үйлдэн прокурорт шилжүүлж ажиллалаа” хэмээсэн юм.
-13 СЕКУНТЫН БИЧЛЭГТ ЦЕГ-ЫН ДЭД ДАРГА АСНЫ ХҮҮГ ШАЛГАЖ ЭХЭЛСЭН ҮҮ-
Тэгвэл Үндэсний шуудан сонины өчигдрийн дугаарт тус 13 секунтын бичлэгийн талаар мэдээлэл нийтэлжээ. Тус мэдээлэлд, “13 секунтын бичлэгийг хуурамчаар хийсэн үү. Хаана хэнтэй хамтарч бичлэгийг хийж гүйцэтгэсэн бэ, тэрбээр юуны учир бичлэг хуурамчаар үйлдэлх болов. Энэ талаар албаны эх сурвалж “Төрийн ордонд иргэн Б амь насаа алдсан хэрэгтэй холбоотойгоор 13 секунтын бичлэг гэх зүйлс яригдаж эхэлсэн.
Хууль хяналтын байгууллага үүнийг нь мөрдөн шалгаж эхэлсэн. Талийгаач Б-гийн ар гэрийнхэнд бичлэг аваачиж өгсөн Г гэдэг нь мөрдөн байцаалтын явцад хуурамч бичлэг гэдгийг хүлээн зөвшөөрсөн. Бүр хэн хэнтэй нийлж бичлэг хийсэн бэ гэдгийг тогтоосон байгаа. Өөрөөр хэлбэл, талийгаачийн ар гэрийнхнээс 15 сая төгрөг залилан авсан нь тодорхой болсон. Дээрх хэрэг шалгагдаж байгаа” гэв.
Өөр нэг албаны эх сурвалжаас авсан мэдээллээр талийгаач Г.Батхүүгийн ар гэрийнхэнд бичлэг аваачиж өгсөн хүн нь Б.Ганзориг гэх залуу гэнэ. Түүний аав нь Дорнод аймгийн харьяат Цагдаагийн Ерөнхий газрын тэргүүн дэд даргаар ажиллаж байсан хурандаа Д.Базаргүр юм байна. Б.Ганзоригийг бусдыг хуурч, мэхэлж, залилсан гэх үндэслэлээр Сүхбаатар дүүргийн цагдаагийн хэлтэст эрүүгийн хэрэг үүсгэн шалгаж байгаа аж” хэмээн мэдээлжээ.
Г.Батхүү агсны ар гэр, өмгөөлөгчийн мэдээлэл
ЦЕГ-ын мэдээлэл
