Коронавирусийн халдвар битүү орчинд 30 хүртэлх минут амьдарч, 4.5 метр зайд тархах чадвартай

Коронавирусийн халдвар битүү орчинд 30 хүртэлх минут амьдарч, 4.5 метр зайд тархах чадвартай

КОВИД-19 өвчлөлийг үүсгэдэг шинэ төрлийн коронавирус битүү орчинд агаарт 30 хүртэл минут амьдарч, 4.5 метр зайд тархах чадвартай болохыг судлан тогтоожээ.

"Энэ нь Дэлхийн эрүүл мэндийн байгууллагын тогтоосон “Аюулгүй зай” буюу хоёр метрийн зайнаас хол тархах аюултайг илтгэж байна" гэж судалгаа хийсэн БНХАУ-ын халдварт өвчин судлаачид анхаарууллаа.

БНХАУ-ын "South China Morning Post" сонинд мэдээлснээр Хунань мужийн эрдэмтэд коронавирусээр халдварласан амны хаалт зүүгээгүй өвчтөн сууж явсан холын зайн автобусанд вирус тархсан тодорхой тохиолдлыг судалсан байна.

Өвчтөн автобусанд түүнээс янз бүрийн зайд сууж явсан долоон хүнийг халдварлуулсан байжээ. Тэдний дотор өвчтөнөөс 4.5 метр буюу зургаан суудлын зайтай сууж явсан хос халдвар авсан байна. Түүнчлэн яг тухайн үед автобусанд зорчиж явсан хүмүүс бууснаас хойш 30 минутын дараа дараагийн ээлжинд суусан нэг зорчигчид коронавирус халдварлажээ.

Зургаар харуулъя:

Улаан - Халдварласан иргэн (Халдвар тараагч)

Шар - Халдвар авсан хүмүүс

Цэнхэр - Халдвар авсан ч шинж тэмдэг хараахан илрээгүй байгаа хүн

Ягаан - Халдвартай иргэн автобуснаас бууснаас хойш 30 минутын дараа автобусанд сууснаар халдвар авсан хүн.

Шинэчлэгдсэн мэдээллээр коронавирус өвчтөн ханиах эсвэл найтаах үед амьсгалын замаар цацагдсан шүлс, шингэний дусал туссан гадаргуу дээр хэдэн хоногийн турш амьдрах чадвартай болохыг эрдэмтэд мөн тогтоожээ.

Ингэхдээ халдварын гадаад орчин орших хугацаа тухайн орчны температур болон тухайн гадаргуун материалаас шалтгаалдаг байна. Тухайлбал, Цельсийн +37 хэмд вирус шил, даавуу, төмөр, хуванцар болон цаасан гадаргуу дээр хоёроос гурав хоногийн туршид идэвхтэй байх чадвартай аж.

Хятадын эрдэмтэд гараа тогтмол угаах, олон нийтийн газар ялангуяа тээврийн хэрэгсэл зэрэг битүү орчинд амны хаалт зүүх нь халдвараас урьдчилан сэргийлэхэд МАШ ЧУХАЛ болохыг онцгойлон анхааруулсаар байна.

Улаанбаатар хотын хувьд коронавирусийн халдвараас сэргийлэх зорилгоор бүх нийтийн тээврийн хэрэгслүүдэд цэвэрлэгээ, ариутгалыг өглөө, оройдоо эрчимтэй хийж байна.