Бүгд Найрамдах Турк Улсаас Монгол иргэдээ авч ирэхээр “МИАТ” компанийн тусгай үүргийн онгоц өглөө “Чингис хаан” ОУНБ-аас хөөрсөн. Улсын онцгой комиссын шийдвэрээр нислэгийн бүрэлдэхүүнд Буянт-Ухаа боомт дахь Хилийн мэргэжлийн хяналтын албаны Эрүүл ахуй, халдвар хамгааллын хяналтын улсын ахлах байцаагч 2, ХӨСҮТ-ийн 1 эмч багтсан.
Улсын ахлах байцаагч, эмч нар нислэгийн явцад зорчигчдод эрүүл мэндийн тандалт хийж ажиллана. Нислэгээр мөн 102 зорчигч явсан бөгөөд экипажийн бүрэлдэхүүнд дөрвөн нисгэгч, хоёр инженер, техникийн ажилтан, 9 үйлчлэгч багтсан байна.
Тусгай үүргийн онгоцоор ирсэн зорчигчид болон эрүүл ахуй, халдвар хамгааллын хяналтын улсын ахлах байцаагчид, ХӨСҮТ-ийн эмч, экипажийн бүрэлдэхүүнийг Улсын онцгой комиссын тогтоолын дагуу 14 хоног тусгаарлана.
