Дэлхийн хөгжмийн ертөнцийг шуугиулж буй “The HU” хамтлагийнхан анхны бие даасан тоглолтоо хийхээр болжээ. Хүннү рок урсгалаар уран бүтээл туурвидаг тус хамтлагийн “Гэрэг” тоглолт тавдугаар сарын 23,24-нд “White rok” төвд болохоор товлогджээ. Тасалбарыг 99 мянга 999 төгрөгөөр борлуулахаар худалдаалд гаргасан байна.
Тус хамтлагийн уран бүтээл YOUTUBE-д өнгөрсөн долоон сарын хугацаанд 20 сая давсан хандалттай байгаа бол iTunes чартын рок дууны төрөлд The HU хамтлагийн “Wolf Totem” (Чонон сүлд) уран бүтээл нэгдүгээрт жагсч, алдарт “The Queen” хамтлагийн “Bohemian Rapsody” дууг ардаа орхиж тэргүүлсэн юм. Мөн “Yuve Yuve yu” (Юу вэ, юу вэ, юу) дуу нь тавдугаарт жагсаад байна.
“The HU” гэдэг нь хүн төрөлхтөн гэсэн утгатай Хүннүгийн үеэс улбаатай монгол үг ба тус хамтлаг нь дөрвөн гишүүнтэй юм. Хөгжмийн зэмсэг, уран бүтээл нь гаднын хөгжмийн урсгалыг шингээгээгүй үндэсний хэв маяг агуулсан тус хамтлагийг Гадаад харилцааны яамнаас дэмжиж ажиллахаа илэрхийлсэн билээ.
