АНУ-ын биотехнологийн “Moderna” компани даваа гаригт клиник туршилтаар тус компанийн боловсруулсан “COVID-19”-ийн вакцин хүний биед амжилттай эсрэг бие үүсгэсэн талаар мэдэгдлээ.
Тус компани нь АНУ-ын Үндэсний эрүүл мэндийн төвтэй хамтран боловсруулсан коронавирусийн “mRNA1273” вакцины вирусийн эсрэг үйлчилгээ, хүний биед үзүүлэх сөрөг нөлөөг судлах клиник туршилтаа үргэлжлүүлж байгаа билээ. Клиник туршилтын нэгдүгээр үе шат зургадугаар сарын 1-нд дуусах хуваарьтай бөгөөд 18-45 насны 45 сайн дурын оролцогчдыг 15-аар нь гурван бүлэгт хуваан тус бүр 25, 100, 250 микрограмм вакцины тунг 28 өдрийн зайтай хоёр удаа тарих юм.
АНУ-ын Массачусетс муж дахь “Moderna” компани даваа гаригт мэдэгдсэнээр вакцины хоёр дахь тунг хийсний дараа 25 микрограмм тун тариулсан бүлэгт хамаарах туршилтад хамрагдагчдын цусан дахь коронавирусийн эсрэг биеийн хэмжээ “COVID-19”-ийн халдвараас эдгэсэн хүмүүсийнхтэй ижил төвшинд хүрсэн үр дүн ажиглагдсан байна. Тэгвэл 100 микрограмм тун тариулсан хүмүүсийн цусан дахь эсрэг биеийн хэмжээ “COVID-19”-ийн халдвараас эдгэсэн өвчтөнүүдийнхээс хэд дахин өндөр байжээ. Харин 250 микрограмм тун тариулсан бүлэгт хамаарах туршилтын үр дүн одоогоор хараахан тодорхой болоогүй аж.
Мөн “mRNA1273” вакцины клиник туршилтад хамрагдсан 9 өөр оролцогчдод “COVID-19” эсрэг саармагжуулагч антибоди үүссэн байна. Эдгээр судалгаанд хамрагдагчдын 4 нь 25 микрограммын тун хийлгэсэн бол үлдсэн 4 нь 100 микрограммын тун тариулсан хүмүүс байгаа аж. Туршилтын үйл явцын талаар “Moderna” компанийн ахлах мэргэжилтэн, доктор Тал Закс ярихдаа “Клиник туршилтын нэгдүгээр үе шатны урьдчилсан үр дүнг харахад “mRNA1273” вакцин коронавирусээс урьдчилан сэргийлэх өндөр боломжтой гэх итгэл үнэмшлийг баталгаажууллаа” гэжээ.
Дэлхийн хэмжээнд өнөөдрийн байдлаар “COVID-19”-ийн вакцин гарган авах 100 гаруй судалгаа хийж байна. АНУ-ын “Moderna” компанийн хувьд хамгийн түрүүнд клиник туршилтаа эхлүүлсэн бөгөөд хамгийн эхэнд судалгааны үр дүнгээ ийнхүү олон нийтэд танилцууллаа.
Компанийн мэдэгдсэнээр “mRNA1273” вакцины клиник туршилтын хоёр, гуравдугаар үе шатыг ирэх зургаа, долдугаар саруудад эхлүүлэхээр төлөвлөөд байгаа аж. Клиник туршилтын хоёрдугаар үе шатанд сайн дурын 600 хүнд вакциныг турших юм. Хэрэв вакцин үр дүнтэй, хэрэглэхэд аюулгүй болох нь клиник туршилтаар тогтоогдвол 2021 оны эхээр эмнэлзүйд нэвтрүүлж, зах зээлд нийлүүлэх боломжтой гэж тус компаниас мэдэгдлээ.
Эх сурвалж: CNN, CNBC
