Франц улсын Парис хотноо зохион байгуулагдах гэж буй 33 дахь удаагийн Зуны олимпын наадам эхлэхэд 29 хоног үлдлээ. Өндөр хүлээлт үүсгээд буй “Парис 2024” Олимпын наадмыг долдугаар сарын 26-аас эхлэн албан ёсны онцгой эрхтэйгээр Централ телевиз болон Premier Sports Network хамтран шууд дамжуулна.
Энэ удаагийн олимпын наадамд нийт 10,500 тамирчин 32 спортын төрөлд 329 медалийн төлөө өрсөлдөхөөр болжээ. Харин “Парис-2024” Олимпод манай улсаас спортын есөн төрөлд 32 тамирчнаа илгээхээр болсон. Үүнээс хамгийн олон тамирчин илгээж байгаа нь Монголын жүдо бөхийн холбоо юм. Парист манай 10 жүдоч хүч үзнэ. Араас нь чөлөөт бөхийнхөн найман тамирчинтай удаалж байгаа бол боксынхон ердөө хоёрхон эрхтэй. Ингэхдээ эрэгтэйчүүд нь Олимпод оролцож чадахгүй. Парисын Олимпод оролцох Монголын багийн бас нэгэн онцлог нь дугуйн төрөлд эрх авсан явдал юм. Энэ төрөлд манай хоёр шилдэг дугуйчин уралдах юм.
