Засгийн газраас хэрэгжүүлэх 14 мега төслийн нэг “Хэрлэн Тооно” төслийн ТЭЗҮ-г боловсруулах гэрээг өнгөрөгч долоо хоногийн баасан гаригт /2024.11.01/ баталгаажуулж, гарын үсэг зуржээ.
Тодруулбал, Монгол Улсын Засгийн газрын 2024-2028 оны үйл ажиллагааны мөрийн хөтөлбөрт эдийн засгийг тэлэх 14 мега төслийг хэрэгжүүлэхээр тусгасан. Энэхүү ажлын хүрээнд Хэрлэн гол дээр олон зориулалттай усан цогцолбор байгуулах "Хэрлэн-Тооно" төслийн техник эдийн засгийн үндэслэлийг боловсруулах ажлыг “Эрдэнэс Оюу толгой” ХХК-ний зүгээс хариуцан ажиллаж байна.
"Хэрлэн Тооно" төслийн Техник Эдийн Засгийн Үндэслэл /ТЭЗҮ/ боловсруулах байгууллагыг сонгон шалгаруулах нээлттэй тендер энэ оны 7 дугаар сард зарлагдаж, тус тендерт “Монхидроконстракшн” ХХК шалгарч, “Эрдэнэс Оюу Толгой” ХХК-ний Гүйцэтгэх захирал Э.Ганхүү, “Монхидроконстракшн” ХХК-ний захирал Б.Оюунбилэг нар үйлчилгээ үзүүлэх гэрээнд гарын үсэг зурж баталгаажууллаа.
Тус төслийн ТЭЗҮ боловсруулах санхүүжилтийг “Оюу Толгой” ХХК хариуцаж буй бөгөөд гүйцэтгэгч компани 1.7 жилийн хугацаанд ТЭЗҮ-г боловсруулахаар төлөвлөсөн байна.
