Эрүүл мэндийн сайдын 2021 оны “Түр заавар шинэчлэн батлах тухай” A/456 дугаар тушаалын нэгдүгээр хавсралтын 2.7.3 дахь хэсэгт:
- Антигенд суурилсан түргэвчилсэн тест эерэг хавьтлуудыг заавал PCR шинжилгээ шаардахгүйгээр батлагдсан тохиолдлоор бүртгэнэ гэжээ.
Өөрөөр хэлбэл, хэрэв иргэн түргэвчилсэн оношлуураар шинжилгээ өгч эерэг гарсан тохиолдолд PCR өгөх шаарлагагүй, батлагдсан тохиолдлоор тооцож, эмчилгээг эхлүүлнэ гэсэн үг юм. Энэ нь халдвартай иргэдийг эрт тусгаарлах, хүндрэлээс сэргийлж эмчилгээг эрт эхлүүлэх, лабораторийн шинжилгээний ачааллыг багасгах, үр ашиггүй зардлыг бууруулах ач холбогдолтой хэмээн албан бичигт дурджээ.
Гэвч үүнээс хэдхэн өдрийн дараа түргэвчилсэн шинжилгээнд “итгэж” болохгүй асуудал яригдав. Тодруулбал, Шадар сайд С.Амарсайхан хоёр хоногийн өмнө/2021.09.21/ Эрүүл мэндийн яаманд ажиллах үеэрээ коронавирусийг илрүүлэх түргэвчилсэн тестээр иргэн шинжилгээ өгч эерэг гарсан үед зайлшгүй тохиолдолд дахин PCR шинжилгээ хийх талаар хэлэлцсэн байна. Учир нь ханиад томууны үед түргэвчилсэн тест КОВИД-19 халдварын нэг адил эерэг хариу үзүүлдэг аж.
Эрүүл мэндийн сайдын тушаалын дагуу өрхийн эмнэлгүүд хавьтал болсон иргэдээс зөвхөн түргэвчилсэн тестээр шинжилгээ авч, эерэг гарсан тохиолдолд эмийн багц өгч буй. Мөн PCR шинжилгээний цаг олдоггүй, төлбөр үнэтэй гэх шалтгаанаар маш олон иргэн эмийн сангаас түргэвчилсэн тест авч, халдвартай эсэхээ тогтоож байгаа.
Гэтэл Шадар сайд “ханиад томууны улиралд түргэвчилсэн тестээр шинжилгээ авахад КОВИД-19 халдварын нэг адил эерэг хариу үзүүлдэг” гэсэн нь Эрүүл мэндийн сайдын тушаалтай зөрчилдөж байна. Тэгвэл түргэвчилсэн тестээр шинжилгээ өгч, аль хэдийн эмчилгээгээ эхлүүлсэн иргэд ханиадтай байсан байж болзошгүй гэсэн үг үү.
Халдвар авсан иргэд антибиотик, арбидол гэх хүчтэй эмүүдийг уудаг. Антибиотик дархлааг унагадаг бол, арбидол ходоодыг гэмтээдэг. Тиймээс заавал зааврын дагуу ходоод хамгаалах эмтэй хамт уухыг эмч нар зөвлөдөг. Гэтэл энэ хугацаанд хэчнээн иргэн ханиад, томуу авсан атлаа түргэвчилсэн тестээр шинжилгээ өгч эерэг гаран, өөртөө коронавирусийн эмчилгээ хийсэн бол. Мөн одоо ч түргэвчилсэн тестээр буруу оношлогдон, ковидын эсрэг хүчтэй эмүүдийг хэрэглэж байгаа иргэд байхыг үгүйсгэхгүй.
Энэ мэт дээд доод шатны удирдах байгууллагуудын уялдаа холбоогүй ажиллагаа, эрх баригчдын эргэж буцсан шийдвэрийн улмаас хэчнээн иргэн эрүүл мэндээрээ хохирч үлдэх вэ.
