Коронавирусийн халдвараас сэргийлж “өндөржүүлсэн бэлэн байдлын зэрэгт шилжүүлэх” хугацааг ирэх арванхоёрдугаар сарын 31-ны өдрийг хүртэл сунгах шийдвэрийг Засгийн газраас гаргасан. Иймд энэ хугацаанд олон нийтийг хамарсан шоу, тэмцээн уралдаан зохион байгуулах нь битгий хэл хурим найр, цайллага, хүлээн авалт хийх ч хориотой. Иймд, саяхан зарим ресторан “хурим найр, хүлээн авалт хийсэн” гэх шалтгаанаар хариуцлагын гэрээг НЗДТГ-аас цуцалсан тохиолдолд ч гарсан.
Тэгвэл өчигдөр /2021.09.17/ Харилцаа холбоо, мэдээллийн технологийн газар, Соёлын яам хамтарч “Digital Nation-2021” нэрийн дор 100 гаруй компанийг хамруулсан арга хэмжээг Үндэсний соёл амралтын хүрээлэн /Хүүхдийн парк/-нд зохион байгууллаа.
Ингээд орой нь олон мянган хүмүүсийн хамруулсан “гэрлийн шоу”болж тус арга хэмжээнд Ерөнхий сайд Л.Оюун-Эрдэнэ өөрийн биеэр оролцлоо.
Гэтэл тус “гэрлийн шоу”-г зохион байгуулахыг цар тахлын энэ үед Нийслэлийн онцгой комисс /НОК/ зөвшөөрөхгүй гэж мэдэгдсэн байгаа юм. Харин Шадар сайд, УОК-ын дарга С.Амарсайхан, “тус арга хэмжээг зохион байгуулахыг дэмжиж, халдвар хамгааллын дэглэмийг чанд сахиулж зохион байгуулах”-ыг мэдэгдсэн байна. Тодруулбал, Шадар сайд С.Амарсайханаас Харилцаа холбоо, мэдээллийн технологийн газарт явуулсан албан бичигт, “Digital Nation 21үзэсгэлэнг Үндэсний соёл амралтын хүрээлэнгин задгай талбайд 9-р сарын 17-19-ний өдрүүдэд зохион байгуулах ажлыг дэмжиж байна” гэжээ.