СТАТИСТИК: 2021 онд Монгол Улсад хорт хавдрын 5981 шинэ өвчлөл бүртгэгджээ

СТАТИСТИК: 2021 онд Монгол Улсад хорт хавдрын 5981 шинэ өвчлөл бүртгэгджээ

"Умайн хүзүүний хорт хавдрын эсрэг-хамтдаа" сэдвийн дор ухуулга нөлөөллийн уулзалт хэлэлцүүлэг болж байна.

Дэлхийн Эрүүл Мэндийн Байгууллагын статистик мэдээллээр 2020 онд 19.2 сая гаруй хүн хорт хавдраар өвдөж, 9.9 сая хүн хорт хавдрын улмаас нас баржээ. Харин Монгол Улс дэлхийд хорт хавдрын нас баралтаар тэргүүлж байна.

Тодруулбал, 2021 онд манай улсад хорт хавдрын 5,981 шинэ өвчлөл бүртгэгдэж, үүний дотор умайн хүзүүний хорт хавдар 5.2 хувийг эзэлж байгаа бөгөөд умайн хүзүүний хорт хавдрын өвчлөлийн түвшин дунджаар 100,000 эмэгтэйд 19.1, нас баралт 100,000 эмэгтэйд 9.6 тохиолдол байгаа нь бүс дотроо өндөр үзүүлэлт юм.

Монгол Улсын тогтвортой хөгжлийн үзэл баримтлал – 2030, Төрөөс эрүүл мэндийн талаар баримтлах бодлого 2017-2026, НҮБ-ын хамтарсан “Умайн хүзүүний хорт хавдраас сэргийлэх, хянах” Глобал хөтөлбөрийн хүрээнд баримт бичгүүд гарч хэрэгжсэн хэдий ч умайн хүзүүний хорт хавдрын өвчлөл, нас баралт буурахгүй байгаа аж.

Умайн хүзүүний хорт хавдрын гол эрсдэлт хүчин зүйл нь хүний 3папиллома3 вирус юм. Бэлгийн замаар дамжин халдварладаг хүний папиллома вирусийн халдвараас сэргийлэх хамгийн гол арга нь уг вирусийн эсрэг вакцин гэж үздэг. Энэхүү вакциныг дэлхийн 120 гаруй улс нэвтрүүлснээс дархлаажуулалтын үндэсний хөтөлбөртөө 90 гаруй улс орон оруулан 9-14 насны охидод хийж эхэлсэн байна.

Манай улс ДЭМБ-ын Номхон далайн баруун бүсэд хамрагддаг бөгөөд тус бүсийн орнуудаас Малайз, Филиппин, Өмнөд Солонгос улс амжилттай хэрэгжүүлсэн гэж үздэг. Умайн хүзүүний хорт хавдар нь урьдчилан сэргийлэх боломжтой ба эрт үе шатандаа төгс эмчлэгддэг хавдар юм.

Өнөөдрийн хэлэлцүүлэгт ДЭМБ-ын Монгол дахь Суурин төлөөлөгч Др Сергей Диордица, ЭМЯ-ны НЭМГ-ын дарга Д.Баярболд, ХСҮТ-ийн захирал Н.Эрдэнэхүү, ХӨСҮТ-ийн захирал Ц.Билэгтсайхан, НЭМҮТ-ийн ерөнхий захирлын албан үүргийг хавсран гүйцэтгэгч Б.Сувд, НЭМГ-ын дарга Б.Бямбадорж болон Аймаг, нийслэлийн ЗДТГ-ын нийгмийн бодлогын хэлтсийн дарга, нийслэлийн нийгмийн хөгжлийн хэлтсийн дарга, Аймаг, нийслэлийн ЭМГ, нийгмийн эрүүл мэндийн хэлтэс, эрүүл мэндийн дэмжих төв, тусгай мэргэжлийн төвүүдийн удирдах албан тушаалтан нар оролцлоо гэж Эрүүл мэндийн яамнаас мэдээллээ.

Умайн хүзүүний хорт хавдартай тэмцэхэд баримталж буй бодлогын баримт бичгүүд:

  • Монгол Улсын засгийн газрын 2020 оны 203 дугаар тогтоолоор батлагдсан монгол улсын засгийн газрын 2020–2024 оны үйл ажиллагааны хөтөлбөрийг хэрэгжүүлэх арга хэмжээний төлөвлөгөө
  • Монгол Улсын эрүүл мэндийн сайдын 2021 оны 360 дугаар тушаалаар батлагдсан “хавдрын эсрэг” арга хэмжээг хэрэгжүүлэх 2021–2024 оны үйл ажиллагааны төлөвлөгөө
  • Монгол Улсын эрүүл мэндийн сайдын 2022 онд баталсан “умайн хүзүүний хорт хавдраас урьдчилан сэргийлэх, хүний папиллома вирусийн эсрэг вакциныг нэвтрүүлэх” ухуулга нөлөөллийн ажлыг хүрээнд хийгдэх 2022 оны төлөвлөгөө
  • Умайн хүзүүний хорт хавдрын өвчлөлөөс сэргийлэхийн тулд анхдагч урьдчилан сэргийлэлтийн ач холбогдлыг нийт хүн амд сурталчлан, таниулах шаардлагатай байна.