Нийслэлийн Ерөнхий боловсролын 151-р сургууль албан ёсоор Кембриджийн хөтөлбөрийг хэрэгжүүлж эхлүүлж байна. Уг үйл ажиллагааны нээлт өнөөдөр /2023.05.09/ боллоо.
ВИДЕО:
УИХ-ын гишүүн Н.Учрал, УИХ-ын гишүүн Э.Батшугар нарын санаачлагаар Англи улс дахь "Cambridge Assessment International Education" байгууллагатай хамтран Кембриджийн хөтөлбөрийг нэвтрүүлэх, заах арга зүйч бэлтгэх сургалтыг зохион байгуулж, Сонгинохайрхан дүүргийн Ерөнхий боловсролын 151-р сургуулийн багш нарыг хамруулжээ. Ингэснээр багш нарын заах арга зүй, хичээлийн хөтөлбөрийг ОУ-ын чанар, стандартад нийцүүлэх боломжтой болох юм. Эхний ээлжид тус сургуулийн дунд анги буюу зургаадугаар ангийн сурагчид ОУ-ын хөтөлбөрийн дагуу, бэлтгэгдсэн ур чадвартай багш нарын тусламжтайгаар дэлхийн хэмжээний боловсрол эзэмших аж.
Өндөр боловсролыг өндөр төлбөртэй хувийн сургуулиас бус өөрийн харьяа дүүргийн сургуулиасаа авдаг болох, ОУ-д хүлээн зөвшөөрөгдсөн сертификаттай төгсөх, гадаадын их дээд сургуулиас тэтгэлэгт хамрагдах боломжтой болох зэрэг нь Кембриджийн хөтөлбөрт шилжих, түүнийг хэрэгжүүлэхийн гол зорилго хэмээн УИХ-ын гишүүн Н.Учрал ярилаа.
Т.Бямбажаргал
