2020-04-21 13:31
Эрүүл мэндийн яамны өнөөдрийн мэдээллээр Интермэд эмнэлэгт үйлчлүүлсэн 69 настай иргэний шинэ коронавирусийн түргэвчилсэн оношлуурын хариу эерэг гарсан мэдээлж байсан.
Тэгвэл тус иргэний PCR шинжилгээ сөрөг гарсан талаар ЭМЯ фейсбүүк хуудастаа мэдээллээ.
Өөрөөр хэлбэл тус иргэн шинэ коронавирусийн халдваргүй гарсан байна.
2020-04-21 12:14
Өнөөдөр өглөөний 5 цагт Интермед эмнэлгээс ирүүлсэн нэг сорьцыг ХӨСҮТ-ийн төв лабораторид шинжилж байна. Амьсгал бачууран, сүүлийн долоо хоногт ханиалгасан, халуунгүй, хоёр уушгиндаа хатгалгаатай, 69 настай иргэнд түргэн оношлуураар шинжилгээ хийхэд эерэг хариу гарчээ.
ХӨСҮТ-ийн ерөнхий захирал Д.Нямхүү энэ тухай ЭМЯ-ны өнөөдрийн хэвлэлийн хурлын үеэр мэдээлэхдээ, “Халдвар судлалын буюу тандалт судалгаагаар гайгүй байх гэж тооцоолж байна. Өвчтөний хүүхэд нэгдүгээр сарын 27-ноос 2 дугаар сарын 7-ны хугацаанд БНСУ-д зорчсоноос хойш хоёр сар гаруй хугацаа өнгөрсөн. Одоогоор тухайн өвчтөнд үйлчилж байсан гурван хүнийг эмнэлэгт нь тусгаарласан. Интермед эмнэлэгт ХӨСҮТ-ээс зөвлөгөө заавар өгч, хянаж байна. Нарийвчилсан буюу PCR шинжилгээний хариу үдээс хойш гарна” гэсэн юм.
