Монголын үндэсний олимпын хороо /МҮОХ/-ны Ерөнхийлөгч Н.Түвшинбаяр баасан гарагт Хан-Уул дүүргийн VIII хороонд баригдаж буй өвлийн спортын “Steppa Arena” ордны барилгын ажлын явцтай танилцлаа.
“Степпа Арена” компанийн удирдлагууд өвлийн спортын ордныг энэ оны 10 дугаар сард ашиглалтад оруулахаар эрчимтэй ажиллаж байгаа бөгөөд байгууламжтай холбоотой зарим мэдээллийг өгсөн юм.
Өвлийн спортын ордон 5700 метр кв ашиглалтын талбайтай, 2600 хүртэлх үзэгчийн суудалтай, Олон улсын олимпын хороо /ОУОХ/-ны стандарт хэмжээ болох 60х30 м мөсөн гулгуурын талбайтай байх аж.
Мөн хөгжлийн бэрхшээлтэй иргэдэд зориулсан зам, талбайтай, Хойд Америк, Европын орнуудад өргөн ашиглаж буй мөсөн талбайн зориулалтын хөргөлтийн төхөөрөмж, агаар сэлгэлтийн системтэй байх юм байна. Түүнээс гадна, танхим тасалгаа, мөсөн гулгуурын талбайг спортын бусад төрлийн уралдаан тэмцээн, соёл урлагийн арга хэмжээ, тоглолтод зориулан хөрвөн өөрчлөх боломжтой байхаар хийж байна.
