Ойрын өдрүүдэд их хэмжээний усархаг бороо орсны улмаас хот хооронд болон хотын гудамж дахь зам талбай эвдэрч, тээврийн хэрэгсэл зорчих боломжгүй болж, зарим чиглэлийн авто замыг хаах хүртэл арга хэмжээ авч, ажиллаж байгаа.
Иймд УИХ дахь Ардчилсан намын зөвлөлөөс авто замын салбарт хэрэгжиж буй төсөл, арга хэмжээний биелэлтийн явцтай танилцах тухай УИХ-ын гишүүн, Зам тээврийн хөгжлийн сайд Б.Энх-Амгаланд албан хүсэлт хүргүүлжээ.
Албан хүсэлтэд, “Зам тээврийн салбарт хэрэгжиж байгаа авто замын төсөл, хөрөнгө оруулалт, бүтээн байгуулалтын ажлуудын явц, тэр дундаа Улаанбаатар-Дархан чиглэл болон Налайхын авто замын бүтээн байгуулалтын ажлын явцтай танилцаж, мэдээлэл авах шаардлагатай байгаа тул холбогдох мэдээллийг төсөл, арга хэмжээ тус бүрээр бэлтгэж 2019 оны наймдугаар сарын 9-ний өдрийн дотор Улсын Их Хурал дахь Ардчилсан намын зөвлөлийн ажлын албанд ирүүлж, Улсын Их Хурал дахь Ардчилсан намын зөвлөлийн 2019 оны 8 дугаар сарын 12-ны өдрийн хуралдаанд ирж танилцуулна уу” гэжээ.
