Ерөнхийлөгч асан Ц.Элбэгдорж твиттер хуудастаа маргааш эх орондоо ирэх болсноо мэдэгдлээ. Тэрбээр "Нутгийн зүг хөлгийн жолоо залахад бэлэн боллоо. Улаанбаатараас Токиод МИАТ-ийн онгоц буух сайхан мэдээ сонслоо. Эх нутагтаа очих сургаар надруу ирэх дайралт ширүүсч байна. Ийм юм надад улам эрч хүч нэмж, намайг хурцалдаг юм. Цаг болж. Би доорхи маягаар хариу барихаар шийдлээ. Болгооно уу" гэжээ.
Нутгийн зүг хөлгийн жолоо залахад бэлэн боллоо. УБ-аас Токиод МИАТ-ын онгоц буух сайхан мэдээ сонслоо. Эх нутагтаа очих сургаар над руу ирэх дайралт ширүүсч байна. Ийм юм надад улам эрч хүч нэмж, намайг хурцалдаг юм. Цаг болж. Би доорхи маягаар хариу барихаар шийдлээ. Болгооно уу pic.twitter.com/ZcmVYJvGt7
— Цахиагийн ЭЛБЭГДОРЖ (@elbegdorj) April 2, 2020
-Х.БАТТУЛГА ДАРААГИЙН СОНГУУЛЬД ДАХИН НЭР ДЭВШВЭЛ БИ ТҮҮНИЙГ СӨРЖ ӨРСӨЛДӨХ БОЛНО-
"Намайг очих мэдээг албаны шугамаар түрүүлж авсан нэгэн их цочин сандарчээ. Ирүүлэхгүй араас нь гүтгээд сууж байх төлөвлөгөө нь нурж, "Чамайг тэнд хорино" гэж хүртэл бичүүлж, сэвж, айлгаж дарамтлах гэж үзжээ. Ингэвэл ирэхээ больчих байх гэж тооцсон бололтой. Би үүнийг хараад юу бодсоноо шууд хэлчихье.
Хэрэв Халтмаагийн Баттулга Ерөнхийлөгчийн дараагийн сонгуульд дахин нэр дэвшвэл би түүнийг сөрж өрсөлдөх болно гэдгээ үүгээр зарлаж байна. Учир нь Х.Баттулга Монголын ард түмний язгуур эрх ашиг, эрх чөлөө, хууль ёсонд хамгийн хор уршиг бүхий албан тушаалтан юм. Түүний харь барьцаанаас монгол төрийг аврах, чөлөөлөх нь Монголоо гэсэн хүн бүрийн нэн тэргүүний зорилт. Намайг Х.Баттулга махны машинаараа хэчнээн далайлгаж, дарамтлах, яллах гэж оролдлоо ч Монгол Улсын хууль, эрх ашгийг зөрчсөн үйлдэл надаас нэг ширхэг ч олж чадахгүй. Надад тийм зүйл байхгүй.
Төрийнхөө хуулийг хүндэтгэж, хар цагаанаа шударгаар ялгуулах нь миний хувьд нэр төр, бахархал байх болно. Эх орон, эрх чөлөө бүтэн байгаа цагт, сонгууль, талцал руу эргэж буцахгүй гэж би өөртөө хатуу шийдсэн байсан.
Гэхдээ хоргоож, боргоогоод хандсан зүгт алхуулахгүй бол тулгарах ямар ч бэрхшээл сорилтоос надад хойш суух шалтгаан байхгүй. Монголын ард түмний язгуур эрх ашиг, ардчилсан эрх чөлөөт сонголтын хувь заяа, ард иргэдийн маань эрх, эрх чөлөөт байдал, миний эрхэм дээд дуудлага зорилт байсаар байх болно" гэжээ.
Харин түүнийг эх орондоо ирсэн даруйд баривчлах тогтоол гарсан талаар зарим хэвлэлээр мэдээлсэн. Харин энэ талаар АТГ, УЕПГ, Шүүхийн байгууллагаас тодруулахад "Баривчлах тогтоол гараагүй" гэсэн хариултыг өгчээ.
