Хууль зүйн болон Инновац, цахим бодлогын байнгын хорооны хамтарсан хуралдаан болж байна. Хуралдаанаар Хүний хувийн мэдээлэл хамгаалах тухай хуулийн төсөл болон хамт өргөн мэдүүлсэн хуулийн төсөл"- ийг хэлэлцэж байна.
Хэлэлцэж буй асуудалтай холбогдуулан гишүүд асуулт асууж, ажлын хэсгээс хариулт авлаа.
УИХ-ын гишүүн Ц.Сандаг-Очир: Хуулийн 8.6-д заасан заалтыг тодруулмаар байна. Мэдээлэл цуглуулах зөвшөөрөлд мэдээллийн эзэн хариу өгөөгүй бөгөөд хариу өгөхөөр тогтоосон хугацаа, ердийн боломжит хугацаа өнгөрсөнийг мэдээлэл цуглуулахад зөвшөөрсөнд тооцох үндэслэл болохгүй гэж байна.
Энэ заалт чинь энэ хуулийн чинь гол зорилгыг хаачихаж байгаа юм биш үү. Би "Таны талаар ашигт малтмал, лиценз, уул уурхайтай холбоотой мэдээлэл цуглуулж байгаа юм" гээд зөвшөөрөл хүссэн. Гэтэл нөгөөх нь мэдээж өөрийнхөө талаар мэдээлэл өгөхгүй шүү дээ. Тэгээд хариу өгөхгүй бол тэр мэдээллийг нь цуглуулж чадахгүй нь л дээ. Үүнийг тодруулж өгөөч. Энэ заалт хатуу заалт байна. Уг мэдээллийг цуглуулж чадахгүй нь байна шүү дээ.
УИХ-ын гишүүн, ажлын хэсгийн ахлагч Н.Учрал: Нийтийн мэдээллийн хууль, хүний хувийн мэдээлэл хамгаалах тухай хууль бол хоорондоо уялдаа холбоотой. Тэр 67 мэдээллийн чинь 5 мэдээлэл нь хаалттай, 5 нь хязгаартай гэх мэтчилэнгээр ангилчихаж байгаа юм.
Хувь хүний мэдээлэл хамгаалах тухай хууль нь нийтийн мэдээллийн хуулиас өөр. Жишээ нь, хувь хүний мэдээллийг ажил олгогч ажилтнаасаа цуглуулж байлаа гэж бодоход мэдээллийн эзэн нь хариу өгөхгүй, хариу өгөхөөр тогтоосон хугацаа, ердийн боломжит хугацаа өнгөрсөнийг мэдээлэл цуглуулахад зөвшөөрсөнд тооцохгүй гэж байгаа. Хугацаа өнгөрсөн нь хамаагүй тухайн мэдээллийг цуглуулж байгаа талд мэдээллийн эзэн хариу өгөөгүй бол мэдээлэл цуглуулсан, зөвшөөрөл өгсөнд тооцохгүй.
УИХ-ын гишүүн Б.Энх-Амгалан: Хувь хүний захидал, чат, мессенжер, фэйсбүүкийн мэдээлэл, хувийн гэрэл зураг гээд янз бүрийн юмнууд гараад байдаг. Үүний аюулгүй байдлыг хэрхэн хангах вэ. Хэвлэл мэдээллийн байгууллага олж байгаа мэдээллээ заавал эзнээс нь зөвшөөрөл авахгүй гэчихээд нөгөө талаараа мэдээлэл цуглуулах боловсруулах, ашиглах хэрэглэхэд аюулгүй байдлыг нь ямар байдлаар хангахаар тусгаж байгаа вэ. Цахим халдлага гээч зүйл асар их байна. Цахим гүтгэлгийг хэрхэн зохицуулах вэ"
УИХ-ын гишүүн, ажлын хэсгийн ахлагч Н.Учрал: Мэдээлэл хариуцагч мэдээлэл цуглуулах боловсруулах үүргийг гэрээний үндсэн дээр мэдээлэл боловсруулагчид шилжүүлж болно гэж 19.1-д заасан байгаа. Энэ нь мэдээллийг цуглуулж боловсруулж байгаа тал түүнийг өөр субъектээр боловсруулуулж болно. Гэхдээ мэдээлэл боловсруулж байгаа тал аюулгүй байдлыг хангах ёстой гэх агуулгыг хуулийн төсөлд оруулж өгсөн байгаа.
