Ховор амьтны жагсаалтад орсон алтайн хойлог шувууг ангаж, хууль бусаар худалдан борлуулах гэж байсан этгээдүүдийг илрүүлсэн талаар Экологийн цагдаагийн газраас өнгөрсөн ням гарагт /2023.03.05/ мэдэгдсэн.
Тодруулбал, Сонгинохайрхан дүүргийн 32-дугаар хорооны нутаг дэвсгэр Эмээлтийн шалган нэвтрүүлэх постоор Ховор амьтны жагсаалтад орсон Алтайн хойлог 13 тооны шувууг агнаж, хууль бусаар худалдан борлуулах зорилгоор тээвэрлэсэн, хадгалсан 10 холбогдогчтой гэмт хэргийн шинжтэй үйлдлийг Экологийн цагдаагийн албаны алба хаагчид илрүүлж мөрдөн шалгах ажиллагаа явуулж байна гэсэн юм.
Тэгвэл Монголын шувуу сонирхогч, судлаачид "Уг мэдээлэлд хавсаргасан зураг нь нэн ховор Алтайн хойлог шувуу биш Улаанбаатар хотод хүртэл гүйж явдаг Дагуур ятуу гэдэг шувуу шүү дээ. Зургийн андуурлаас үүдэж нэн ховор гэж андууран дагуут ятууг алж устгах сэдэл болох вий" хэмээжээ.
Санхуулахад, Ховор ан, амьтанг хууль бусаар агнасан тохиолдолд: Эрүүгийн хуулийн 24.5 дугаар зүйлийн 1 дэх хэсэгт ховор амьтныг тусгай зөвшөөрөлгүйгээр агнасан, барьсан, зориудаар тэжээж гаршуулсан, үржүүлсэн, тэдгээрийн гаралтай түүхий эдийн зүйлийг хадгалсан, худалдсан, худалдан авсан, тээвэрлэсэн, гадаад улсад гаргасан, ховор амьтны чихмэл, эд, эрхтэн, тэдгээрийн гаралтай түүхий эдийн цуглуулга хийсэн бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэдэг.
Мөн Байгаль орчныг хамгаалах тухай хуулийн 49 дүгээр зүйлийн 49.2 дэх хэсэгт “...амьтны аймагт учирсан хохирлыг тухайн амьтны учирсан хохирлыг экологи эдийн засгийн үнэлгээг 2 дахин нэмэгдүүлсэнтэй тэнцэх хэмжээ”-гээр нөхөн төлүүлэхээр заасан байдаг.
