Баянзүрх дүүргийн Нийгмийн даатгалын хэлтэс (НДХ)-ийн ажилтнуудыг хууль хяналтын байгууллагаас улсын бүртгэлд зориуд худал мэдээлэл оруулсан, мэдээллийг устгаж, өөрчилсөн гэх үндэслэлээр шалгаж эхэлжээ.
-НДХ-ИЙН АЖИЛТНУУДЫГ ШАЛГАХ АЖЛЫН ХЭСЭГ БАЙГУУЛАГДСАН-
Баянзүрх дүүргийн нийгмийн даатгалын хэлтсийн орлого, шимтгэлийн тагсийн дарга У.Хаш-Эрдэнэ, улсын байцаагч П.Одбаяр, Э.Нямдорж нарыг холбогдуулан мөрдөн шалгах ажиллагаа явуулж буй бөгөөд урьдчилсан байдлаар нийгмийн даатгалын шимтгэл төлж байгаагүй 80 орчим иргэнийг Нийгмийн даатгалын мэдээллийн санд өндөр цалинтай ажилладаг мэтээр хуурамчаар оруулсан байжээ. Ингэхдээ мэдээллийг төлбөртэй оруулж төд удалгүй устгадаг байсныг цагдаагийнхан илрүүлсэн байна.
Дээрх гурван хүнтэй хамт шуурхай зээл олгодог, гадаад улсын виз мэдүүлэх үйл ажиллагаа эрхэлдэг н.Болорсайхан гэх хүнийг шалгаж байгаа аж.
Хэрэг бүртгэлтийн явцад дээрх албан тушаалтнууд нь арилжааны банкнаас зээл авч буй иргэдэд аж ахуйн нэгжийн албан бланк дээр хуурамчаар цалингийн тодорхойлолт, нийгмийн даатгалын дэвтэр, бусад шаардлагатай бичиг баримт бүрдүүлж өгснийхөө төлөө хүн тус бүрээс 4-5 сая төгрөгийн авлигал авч байсан байж болзошүй байгаа ажээ.
-ТАСГИЙН ДАРГА У.ХАШ-ЭРДЭНЭ, УЛСЫН БАЙЦААГЧ П.ОДБАЯР, Э.НЯМДОРЖ НАРЫГ ЯЛЛАГДАГЧААР ТАТЖЭЭ-
Түүнчлэн дээрх хүмүүсээр хуурамч баримт бүрдүүлүүлж авсан дээрх 80 орчим иргэн ТҮЦ машинаас тодорхойлолт аваад арилжааны банкуудад аваачиж өгөн нэг нь л гэхэд 30 орчим сая төгрөгийн зээл авсан, бусад хүнтэй хамтран зээлдэгчээр оролцон банкуудад 1.6 тэрбум орчим төгрөгийн хохирол учруулсан байж болзошгүй нь тогтоогдсон гэх мэдээлэл байгаа юм.
Өдгөө Баянзүрх дүүргийн НДХ-ийн Орлого, шимтгэлийн тасгийн дарга У.Хаш-Эрдэнэ, улсын байцаагч П.Одбаяр, Э.Нямдорж нарыг Эрүүгийн хуулийн 23.4-1 дэх хэсэгт заасан “Нийтийн албан тушаалтан, албан хаагч өөртөө, бусдад давуу байдал бий болгох зорилгоор хуулиар тогтоосон улсын бүртгэлд зориуд худал мэдээлэл оруулсан, мэдээллийг устгасан, өөрчилсөн, худал мэдээлэл бүхий баримт бичиг үйлдэж бусдад олгосон” гэх үндэслэлээр яллагдагчаар татжээ.
