Киргизийн Дотоод хэргийн яамны Интерполын товчоо монголын талтай хамтран шуурхай эрэн хайх ажиллагааг явуулж 41 настай монгол иргэн Г.У-г Бишкек хотод саатуулжээ. Г.У нь 2022 оноос хойш хар тамхи, сэтгэцэд нөлөөт бодисыг хууль бусаар борлуулж, үйлдвэрлэсэн хэргээр эрэн сурвалжлагдаж байсан талаар бид өмнө нь мэдээлсэн.
Тэгвэл олон Улсын Эрүүгийн цагдаагийн байгууйллага Интерполын “Улаан булант” зар мэдээгээр эрэн сурвалжлагдаж байсан Монгол Улсын иргэнийг шилжүүлэн авчрах ажиллагааг зохион байгуулж буй талаар ЦЕГ-аас мэдээллээ.
Энэ талаар ЦЕГ-аас "Цагдаагийн ерөнхий газраас Олон Улсын Эрүүгийн цагдаагийн байгууллага Интерполын “Улаан булант” зар мэдээгээр эрэн сурвалжлагдаж байсан Монгол Улсын иргэн “У”-г Бүгд Найрамдах Киргиз Улсын Интерполын Үндэсний төв товчоотой хамтран ажилласны үр дүнд тус улсын нутаг дэвсгэрт саатуулан баривчилж, шилжүүлэн авчрах ажиллагааг зохион байгуулж байна. Дээрх этгээд нь 2023 онд Мансууруулах сэтгэцэд нөлөөт бодисыг бусдад худалдаалах зорилгоор Монгол Улсын хилээр нэвтрүүлсэн гэх гэмт хэрэгт холбогдон шалгагдаж байгаа бөгөөд Киргиз улсад мөн хар тамхи мансууруулах бодис худалдаалах шинжтэй үйл ажиллагаа явуулж байсан талаар Бүгд Найрамдах Киргиз Улсын Дотоод хэргийн яамнаас мэдээлсэн байна" гэж мэдээлэв.
