УИХ дахь МАН-ын бүлэг даваа гараг болгоны ээлжит хуралдаанаа хийлээ. Хуралдаанаас гарсан шийдвэрийн талаар бүлгийн дарга Д.Тогтохсүрэн танилцууллаа.
Бүлгийн дарга Д.Тогтохсүрэн “Өнгөрсөн долоо хоногт Ерөнхийлөгч У.Хүрэлсүхээс Улс төрийн намын тухай хуулийн төсөл болон бусад дагалдах хууль, тогтоолын төслийг УИХ-ын даргад өргөн мэдүүлсэн. Энэ нь сүүлийн 20-иод жилийн хугацаанд анх удаагаа шинэчилсэн найруулгаар орж ирж байгаа томоохон хуулийн төсөл болж байна.
Монгол Улсын Ерөнхийлөгч үндэсний эв нэгдлийг хангах чиг үүргийн хүрээнд Улс төрийн намын тухай хуулийг санаачилсан. Ингэхдээ сүүлийн хоёр жил гаруй хугацаанд парламентад суудалтай болон суудалгүй улс төрийн намуудтай хуулийн төсөлд хамтарч ажилласан. Хуулийн төслийг дараах онцлогуудтай гэж үзэж байна.
- Улс төрийн намуудын хариуцлагыг дээшлүүлэх талаар томоохон өөрчлөлтийг оруулж байна. Төрийн үйл хэрэгт оролцож байгаа учраас улс төрийн намуудын хариуцлагыг дээшлүүлэх зайлшгүй шаардлагатай. Тухайлбал, УИХ-ын сонгуульд хоёр дараалан оролцоогүй тохиолдолд идэвхгүй байдалд шилжүүлэх, улмаар хариуцлага тооцож, тараах зэрэг арга хэмжээ авах шаардлагатай талаар хуулийн төсөлд тусгасан.
- Улс төрийн намууд нь улсын хэмжээнд үйл ажиллагаа явуулах ёстойг онцолсон.
- Улс төрийн намуудын санхүүжилтийг ил тод, нээлттэй болгох, тайлангаа гаргаж, аудитын байгууллагаар дүгнүүлдэг тогтолцоог бий болгох талаар хуульд тусгасан.
- Улс төрийн намыг бүртгэх, үйл ажиллагаанд нь хяналт тавих чиг үүргийг Сонгуулийн Ерөнхий хороонд хариуцуулж байна. Эдгээр үндсэн дөрвөн чиг үүргийн хүрээнд Улс төрийн намын тухай хуулийг боловсруулсан байна. Хуулийн төслийг МАН-ын бүлгийн хуралдаанаар хэлэлцээд, дэмжих нь зүйтэй гэж үзлээ.
Улс төрийн намын тухай хуулийн төслийг энэ долоо хоногт УИХ-ын байнгын хороод болон нэгдсэн чуулганы хуралдаанаар хэлэлцэнэ. Мөн УИХ-ын чуулганаар хэлэлцэхийг дэмжсэн тохиолдолд ажлын хэсэг байгуулж, хуулийн төслийг боловсруулснаар хаврын чуулганаар хэлэлцэж дуусах төлөвтэй байна” гэв.
