Ерөнхийлөгч У.Хүрэлсүх, гэргий Л.Болорцэцэг нарын урилгаар Польш улсын Ерөнхийлөгч Анджей Дуда гэргий Агата Корнхаузер-Дудагийн хамт манай улсад энэ сарын 24-26-нд төрийн айлчлал хийнэ.
Ерөнхийлөгчийн айлчлалын үеэр Бүгд Найрамдах Польш улсын Элчин сайдын яамны нээлт болох юм.
Польш Улс 1960 оноос Улаанбаатарт ЭСЯ-аа нээн ажиллуулж байгаад санхүүгийн асуудлын улмаас 1995 оны есдүгээр сард ЭСЯ-аа хааж байжээ. Харин 1999 онд ЭСЯ-аа сэргээн нээж, Дипломат 95 орон сууцны байрт байрлаж байсан аж. Гэвч Польшийн тал ЭСЯ-аа 2009 онд дахин хааж, Бээжингээс манай улсыг хавсран сууж байсан. Харин 2015 оноос Варшаваас Монголыг хариуцаж ажиллах Элчин сайдыг томилсон юм. Польшийн Засгийн газар Улаанбаатар хотноо Элчин сайдын яамаа нээх шийдвэрийг 2021 оны 1 дүгээр сарын 15-ны өдөр гаргаж, байнгын үйл ажиллагаагаа эхлүүлсэн бөгөөд ийнхүү маргааш албан ёсны нээлт болно.
Харин манай улсын ЭСЯ Варшавт 1959 оноос тасралтгүй ажиллаж байна. Польшийн ЭСЯ-ыг Улаанбаатар хотод нээнэ.
