УИХ-ын дэд дарга С.Одонтуяа Гандантэгчинлэн хийдэд хүүхдийн эрх ноцтой зөрчигдсөн асуудлаар Хүний эрхийн үндэсний комисст хандсан байна.
Тус бичигт, "Монгол Улсад сүүлийн үед хүний эрх, хүүхдийн эрхүүд ноцтойгоор зөрчигдөж байгаа тухай мэдээлэл ихээр гарч байна. Гандантэгчинлэн хийдэд шавилан суудаг хүүхдүүд бэлгийн дарамтад өртдөг тухай ноцтой мэдээлэл цацагдлаа. Энэ хэргийг Баянгол дүүргийн цагдаагийн газраас Эрүүгийн хуулийн 12.1 дүгээр зүйлд заасан гэмт хэргийн шинжтэй мэдээллийг гомдол, мэдээллийн бүртгэлд авч, мөрдөн шалгах ажиллагаа явуулж байна. Хүний эрхийн Үндэсний Комиссоос сүм, хийдүүдэд шавилан сууж байгаа хүүхдүүдийн эрхийн асуудлыг хөндсөн судалгааг өнгөрсөн жил хоёр удаа хийсэн. Тус судалгаануудын тайлан, дүн мэдээллийг яаралтай ирүүлнэ үү" хэмээн дурдаж Хүний эрхийн үндэсний комисст хүргүүлжээ.
