Өнөөдөр /2023.12.18/ хуралдсан МҮОНРТ-ийн Үндэсний зөвлөлийн хурлаар тус радио, телевизийн Ерөнхий захирал А.Бүрэнбаатарыг үүрэгт ажлаас нь чөлөөлсөн байна. Гэтэл МҮОНРТ-ийн Үндэсний зөвлөлийн энэхүү шийдвэртэй холбогдуулж тус зөвлөлийн зарим гишүүдийг АТГ-т өгч, шалгуулна гэдгээ А.Бүрэнбаатар мэдэгдлээ.
Тэрбээр, "Үндэсний зөвлөл өнөөдөр хуралдаж намайг огцруулсан талаарх мэдээллийг авсан. Надад тогтоол танилцуулна гэж байна. Өнгөрсөн зургаадугаар сард бас намайг огцруулсан юм аа. Ирцгүй байхад ирцтэй болгож шийдвэр гаргасан. Энэ тогтоол нь хүчингүй болсон. Гэтэл энэ удаад бас л хууль бус шийдвэр гаргалаа. Түүхч Д.Өлзийбаатар гэдэг хүн найман сарын хугацаанд Үндэсний зөвлөлийн хуралдаа суугаагүй. Гэтэл өнөөдрийн хуралд сууж шийдвэр гаргасан байна. Иймд энэ хурлын шийдвэр хүчингүй гэсэн үг. Учир нь хуулинд "Үндэсний зөвлөлийн гишүүн биечлэн найман сар хуралдаа суугаагүй бол чөлөөлнө" гэж заасан байдаг. Д.Өлзийбаатарыг чөлөөлөх Хяналтын зөвлөл чөлөөлөх шийдвэр гаргачихаад байхад МҮОНРТ-ийн Үндэсний зөвлөлийн дарга Д.Батсүх гэдэг хүн тэрхүү шийдвэрийг хүчингүй болгосон. Иймд би Д.Батсүхийг АТГ-т өгч шалгуулна. Мөн нэвтрүүлэгч Д.Цоодолыг АТГ-т өгч шалгуулна" гэлээ.
ВИДЕО:
АТГ-ын үүдэнд МҮОНРТ-ийн Ерөнхий захирал А.Бүрэнбаатар АЖЛААСАА ЧӨЛӨӨЛӨГДСӨН талаараа мэдээлэл өгч байна @AsuNewsMon pic.twitter.com/DcB9aFCd6T
— Д. УУГАНБААТАР (@_UUGANBAATAR) December 18, 2023
