Гадаадын тагнуулын алба, байгууллага, иргэнтэй хууль бусаар хамтран ажилласан гэх хэрэгт холбогдсон яруу найрагч Ц.Хулан, Б.Отгонбаатар нарт холбогдох хэргийн давж заалдах шатны шүүх хурал өнгөрсөн оны арваннэгдүгээр сарын 01-ний өдөр болж, анхан шатны шүүхээс Ц.Хуланд оноосон 9.6 жилийн хорих ялыг хөнгөрүүлэн өөрчилж, 8.1 жил болгосон бол Б.Отгонбаатарыг эрүүгийн хариуцлагаас чөлөөлж шийдвэрлэсэн билээ.
Тэгвэл Ц.Хулан нь Улсын дээд шүүхэд хандсан бөгөөд уг гомдлыг хэлэлцэх эсэхийг Улсын дээд шүүх хэлэлцэхээр товлосон байна. Тодруулбал, Сүхбаатар дүүргийн Эрүүгийн хэргийн анхан шатны шүүхийн 2023 оны долдугаар сарын 25-ны өдрийн 736 дугаар шийтгэх тогтоол, Нийслэлийн Эрүүгийн хэргийн давж заалдах шатны шүүхийн 2023 оны арваннэгдүгээр сарын 01-ний өдрийн 1060 дугаар магадлалтай, Ц.Хулан, Б.Отгонбаатар нарт холбогдох /маш нууц/ хэргийг гаргасан шүүгдэгч Ц.Хулан, түүний өмгөөлөгч Ч.Өнөржаргал, Ж.Батхуяг нарын хамтран гаргасан гомдлыг Улсын дээд шүүх нэгдүгээр сарын 24-ний өдөр хаалттай хянан хэлэлцэхээр товлосон байна.
