Дэлхийн хотуудын жишгээр Улаанбаатар хот 2024 онд бонд гаргаж, УИХ-ын сонгуулийн өмнө буюу 2024 оны зургаадугаар сарын 25-ны өдөр анхдагч арилжаагаа хийсэн билээ. “Нийслэл” бондоос босгох 500 тэрбум төгрөгийн 300 тэрбумыг "Бөөрөлжүүтийн цахилгаан станц"-д оруулсан. Бонд бол тодорхой хэмжээний мөнгийг тодорхой хугацаанд тохиролцсон хүүгээр зээлүүлсэн үнэт цаас юм. Товчхон хэлбэл, зээл билээ.
-ОРОН НУТГИЙН ДУГААРТАЙ ТЭЭВРИЙН ХЭРЭГСЭЛ УЛААНБААТАРТ 48 ЦАГААС ИЛҮҮ ХУГАЦААГААР БАЙВАЛ ХОНОГ ТУТАМ 5000 ТӨГРӨГИЙН ХУРААМЖ АВДАГ БОЛСОН НЬ "НИЙСЛЭЛ БОНД"-ТОЙ ХОЛБООТОЙ ЮУ -
Тэгвэл эх сурвалжийн мэдээлж буйгаар, Хотын захирагч Х.Нямбаатар “Нийслэл” бондоос 500 тэрбум босгохын тулд "Автозамын сан"-г барьцаанд тавьсан гэх мэдээлэл байна. Тэрбээр "Автозамын сан-д төвлөрүүлдэг төрөл бүрийн татварыг нэмэгдүүлэх шийдвэрийг удаа дараа гаргасан нь үүнтэй холбоотой байж болзошгүй байгаа юм. Өнгөрсөн хугацаанд нийслэл хотод орон нутгийн дугаартай тээврийн хэрэгсэл Улаанбаатарт нэвтэрснээс хойш 48 цаг болоод гарахад 1000 төгрөг, 48 цагаас дээш бол хоног тутамд 5000 төгрөгийн хураамж авахаар тогтсон.
Мөн тэрбээр хотын А бүсэд иргэд машинтай зорчиход 27500 төгрөгийн хураамж авдаг болох хуулийн төслийг УИХ-д оруулж ирсэн ч олон нийтийн эсэргүүцэлтэй тулсан учир буцаасан юм.
Хуулийн төсөлд Баруун дөрвөн замаас Зүүн дөрвөн зам, 32-ын тойргоос Энхтайваны гүүр хүртэл замыг төлбөртэй бүс болгохоор тусгасан байсан билээ. Мөн Хотын даргаар Д.Сумъяабазар ажиллаж байхдаа Хотын төвөөр Улаанбаатарын дугаартай автомашин км тутамдаа 15, орон нутгийнх 45 төгрөг төлж зорчих журмыг хүртэл боловсруулж байв. Энэ мэт өнгөрсөн хугацаанд түгжрэл бууруулах нэрээр зам ашигласны төлбөрийг бүхий л хэлбэрээр нэмэх гэж оролдож ирсэн нь "Авто замын сан"-г "Нийслэл бонд"-ын барьцаанд тавьсантай холбоотой байж болзошгүй байна. "Автозамын сан"-д жилд 30 тэрбум төгрөг төвлөрдөг бөгөөд энэ мэтээр иргэдээс авдаг татварыг зүйл бүрээр нэмж байгаа нь автозамын санг зузаатгах зорилготой байхыг үгүйсгэхгүй. Ташрамд сонирхуулахад, “Нийслэл” бондоос төвлөрүүлсэн мөнгөний үлдэгдэл 150 тэрбумыг авто зам, замын байгууламжийн засвар, шинэчлэлтийн ажилд 50 тэрбумыг, бохир усны Туул-1 коллектор болон үерийн байгууламж ариутгах ажилд тодорхой хувийг төсөвлөсөн байдаг юм. Хотын дарга Х.Нямбаатар бонд босгосон асуудлаар хэвлэлд өгсөн ярилцлагадаа "Гадаад бонд гарсан тохиолдолд зургаан сар тутам хүүг төлнө. Түгжрэлийг бууруулахад 150 тэрбум төгрөг төсөвлөсөн. Түгжрэлийг бууруулах төсөл дотоод бондоос зарцуулах 150 тэрбум төгрөг хоёр агуулга нь адил боловч бүтцийн хувьд өөр. Бид 2025, 2026 онд нийслэл хот замаа хучих Замын сангийн мөнгөө урьдчилж хэрэглэж байгаа гэсэн үг" гэж байв.
Б.Наранчимэг
