БНСУ-ын иргэнд бэлгийн дарамт үзүүлсэн гэх хэрэгт холбогдсон Үндсэн хуулийн Цэцийн дарга Д.Одбаяр өмгөөлөгч авчээ. Солонгосын талаас Нисэхийн аюулгүй байдлын тухай хуулийг мөрдөн Д.Одбаярыг гадаад улсын иргэн, өмнө нь гэмт хэрэгт холбогдож ял шийтгэл авч байгаагүй хэмээн торгуулийн арга хэмжээ авахаар төлөвлөсөн тухай тус улсын хэвлэлүүд мэдээлж байгаа юм. Хуулийн торгуулийн дээд хэмжээ 10 сая вон хэдий ч түүнд 1-5 сая вонын торгууль оногдуулахаар төлөвлөсөн гэсэн мэдээлэл байна.
Мөн хэрэг гарах үеэр Д.Одбаяртай хамт явсан гэх монгол улсын иргэн А-ыг интерполоор эрэн сурвалжилж, албадан авчрах шийдвэрийг гаргасан байдаг. Харин А нь Д.Одбаярыг Хууль зүйн сайд байхад нь түүний албанд ажиллаж байсан. Мөн тэрээр хууль зүйн яаманд ажиллаж байснаас гадна Монголын цахилгаан холбоо, Банкны өр барагдуулах алба, Цемент шохойн үйлдвэр, Санхүүгийн зохицуулах хороо, “Эрдэнэс монгол” компани зэрэгт ажиллаж байсан гэсэн мэдээлэл байна.
Одоогоор Үндсэн хуулийн цэцийн дарга Д.Одбаярыг хилийн хориг тавьсан нөхцөлтэйгээр шалгах ажиллагааг үргэлжлүүлж байгаа ажээ. Шалгагдагч Д.Одбаярын зүгээс БНСУ-ын Прокуророос Монгол руу нисэх зөвшөөрөл хүссэн талаар бид өмнө нь мэдээлж байсан. Гэвч зарим эх сурвалжийн мэдээлж буйгаар БНСУ-ын Прокуророос Д.Одбаярт Монгол руу нисэх зөвшөөрөл өгөхөөс татгалзсан байна. Түүнийг мөнгөн торгууль төлөх, нээлттэй байдлаар уучлал гуйх арга хэмжээ авахаар яригдаж байгаа аж.
