Монгол Улсын Ерөнхий сайд Л.Оюун-Эрдэнэ БНТУ-аас Монгол Улсад суугаа Онц бөгөөд Бүрэн Эрхт Элчин сайд Ахмет Язалыг хүлээн авч уулзлаа. Энэ үеэр Ерөнхий сайд Л.Оюун-Эрдэнэ "Дэлхий дахинаа коронавирусийн цар тахалтай тэмцэж буйтай нэгэн адил Монгол Улс дотооддоо халдварын тархалтыг хумьж, эдийн засаг бизнесээ дэмжих, үйл ажиллагааны хэвийн горимд шилжих зорилт тавьж, “Нэг хаалга нэг шинжилгээ” арга хэмжээг зохион байгуулж байна. Улс орныхоо эдийн засгийг сэргээх, худалдаа бизнес эрхлэгчдээ дэмжих 10 их наядын цогц хөтөлбөр хэрэгжүүлэхээр баталсан.
2021 оны хоёрдугаар сарын 23-ны өдрөөс коронавирусийн халдварын эсрэг бүх нийтийн дархлаажуулалтыг эхлүүлснээр Монгол, Туркийн агаарын тээвэрлэлтийг нээж, аялал жуулчлалыг идэвхжүүлнэ" гэв.
Харин Элчин сайд Ахмет Язал"Манай хоёр улс агаарын тээврийн хэлэлцээгээ 2019 онд шинэчлэн баталсан. Үүнд Ерөнхий сайд таны үүрэг чухал байсан. “Туркиш эйрлайнс” компани дэлхийн 100 гаруй улс руу нислэгээ нээгээд байна. Монгол Улс руу ирэх 4 дүгээр сараас сард 2, цаашдаа түүнээс олон удаа шууд нислэг үйлдэхээр төлөвлөж байна. Мөн авто замын ачаа тээврийг нэмэгдүүлэх, арьс шир зэрэг бараа бүтээгдэхүүн импортлох сонирхол байна. Түүх, соёлын харилцааны хүрээнд БНТУ-д хамтарсан үзэсгэлэн гаргах, хөшөө дурсгалыг хамгаалах, музей байгуулах зэрэг төлөвлөсөн олон ажил байгаа" гэв.
Цаашид Монгол Туркийн харилцаа шинэ түвшинд гарна гэдэгт бүрэн итгэлтэй байгаагаа уулзалтын төгсгөлд талууд тэмдэглэв гэж Засгийн газрын Хэвлэл мэдээлэлтэй харилцах газраас мэдээллээ.
