Монголын Үндэсний олимпын хороо /МҮОХ/-ны бүх гишүүдийн хурал өчигдөр /2021.08.26/ цахимаар болон танхимаар явагдсан байна.
Тус хурлаар МҮОХ-ны энэ оны эхний найман сарын үйл ажиллагааны мэдээллийг хүргэж, “Токио-2020” олимпын наадамд Монголын багийн оролцсон тайланг хэлэлцжээ. Мөн МҮОХ-ны гишүүнчлэлийн асуудлыг хэлэлцэж, холбоодоос ирсэн хүсэлтийн дагуу зарим гишүүний эрхийг дуусгавар болгож, зарим хүнийг МҮОХ-ны гишүүнээр сонгосон байна.
Хурлаар хамгийн сүүлд хэлэлцсэн асуудал нь МҮОХ-ны ээлжит чуулганы товыг тогтоох байв.
Ингээд хуралд оролцсон гишүүдийн саналаар ирэх арваннэгдүгээр сарын 30-нд МҮОХ-ны чуулганыг хуралдуулахаар тогтжээ. Чуулганаар ирэх олимпын мөчлөгт МҮОХ-г удирдах бүрэлдэхүүн ерөнхийлөгч, тэргүүн дэд ерөнхийлөгч, дэд ерөнхийлөгч, Гүйцэтгэх зөвлөлийн гишүүдийг сонгох юм. Зарим эх сурвалжийн мэдээлж буйгаар МҮОХ-ны удирдлагад Ерөнхийлөгч асан Х.Баттулга болон УИХ-ын гишүүн С.Батболдын хүү Б.Баттүшиг нар өрсөлдөж магадгүй байгаа аж. Учир нь Н.Түвшинбаяр хэрэгт холбогдсон тул түүний ажлыг тус холбооны Тэргүүн дэд ерөнхийлөгч Б.Баттүшиг гүйцэтгэх болсон билээ.
