Японы Цог Жавхлант Эзэн хаан Нарүхито, Эрхэм Дээд хатны хамт өнөөдөр /2025.07.06/-өөс найм хоногийн хугацаанд Монгол Улсад төрийн айлчлал хийх гэж байгаа билээ. Тэгвэл энэхүү түүхэн айлчлалын талаар NHK мэдээллийн агентлаг мэдээлэл нийтэлжээ. Тус мэдээлэлд:
"Японы эзэн хаан Нарухито, хатан хаан Масако нар энэ Ням гараг /2025.07.06/-т Монгол Улсад найман өдрийн хугацаатай албан ёсны айлчлал хийхээр Токиогийн Ханеда нисэх онгоцны буудлаас тусгай үүргийн нислэгээр хөдөлнө. Тэд үдээс хойш Монгол Улсын нийслэл Улаанбаатарт газардаж, түүхэн айлчлалаа эхлүүлэх юм.
Мягмар гараг /2025.07.08/-т эзэн хаан, хатан хаан нар төрийн зочдыг хүндэтгэн хүлээн авах ёслолд оролцож, Монгол Улсын Ерөнхийлөгч Ухнаагийн Хүрэлсүх болон тэргүүн хатагтайтай уулзалт хийнэ. Уламжлалт гэр хэлбэрийн тусгай байгууламжид зохион байгуулагдах бөгөөд энэ уулзалтад хоёр орны төлөөлөгчид оролцох юм. Тэд орой нь албан ёсны хүлээн авалтад уригдана.
Мөн айлчлалын хүрээнд, дэлхийн хоёрдугаар дайны дараа хуучин ЗХУ-д саатуулагдаж, Монгол Улсад илгээгдэн хүнд хөдөлмөр эрхэлж байх үедээ амиа алдсан Япон иргэдэд зориулсан дурсгалын хөшөөнд хүндэтгэл үзүүлнэ. Энэ жил Дэлхийн хоёрдугаар дайн өндөрлөсний 80 жилийн ой тохиож буйг тохиолдуулан энэхүү үйл явдал нь онцгой ач холбогдолтой юм.
Эзэн хаан Нарухито, хатан хаан Масако нар долоодугаар сарын 13-ныг хүртэлх айлчлалын хугацаандаа Монголын түүх, соёлтой танилцаж, нутгийн иргэдтэй уулзах, харилцах боломжийг эрэлхийлж байна. Түүнчлэн аяллынхаа төгсгөлд Үндэсний их баяр наадмын нээлтэд оролцож, сур харваа, хурдан морины уралдаан зэрэг уламжлалт наадмын үзүүлбэрүүдийг сонирхоно. Айлчлалын хүрээнд тэд адууны өвөг болох тахь адууны амьдрах орчин болсон дархан цаазат газар бүхий уудам бэлчээрийн байгалийн цогцолборт газарт зочлох төлөвлөгөөтэй байна.
Энэ нь эзэн хааны хувьд хаан ширээнд сууснаас хойш хийж буй дөрөв дэх албан ёсны гадаад айлчлал бөгөөд тэд Япон улсын түүхэнд Монголд айлчилсан анхны эзэн хаан, хатан хаан болж байна. Энэ айлчлал нь хоёр улсын найрсаг харилцаа, түүхэн дурсамж, соёлын харилцан ойлголцлыг улам бэхжүүлэх чухал үйл явдал болох юм" гэжээ.
Эх сурвалж: NHK
