Нийслэлийн онцгой комиссын Шуурхай штабаас 24 цагийн нөхцөл байдал, хэрэгжүүлсэн арга хэмжээнүүдийн талаар мэдээллээ. НОК-ийн шуурхай штабын удирдлагын багийн гишүүн Э.Эрдэнэбаатар “УОК-оос өгсөн үүрэг чиглэлийн дагуу 12 сарын 11-ний өдрөөс хойш бүх нийтийн бэлэн байдлыг үргэлжлүүлэн сунгах эсэх, ААН-ийн үйл ажиллагааг хэсэгчлэн нээх эсэхтэй холбогдуулан нийслэлийн Онцгой комиссын шуурхай штаб болон холбогдох мэргэжлийн багийн хамтарсан ажлын хэсэг ажиллаж байна.
Эхний ээлжид үйл ажиллагааг нь нээх ААН-ийн тооцоо судалгаа, саналыг судалж, мөрдөх түр зааврыг боловсруулж байна. Маргааш буюу 12 сарын 7-ны өдөр УОК-т урьдчилсан байдлаар саналаа хүргүүлнэ.
Түүнчлэн нийслэлд батлагдсан тохиолдол бүртгэгдэх үед ойрын хавьтлуудын зураглалыг гаргаж, холбогдох ажлыг хийж байна. Энэ ажлын хүрээнд И-март компанийн 385, Баянзүрх захын 336 ажилтнаас тандалтын зорилгоор шинжилгээ авсан. Хариу нь одоогоор гараагүй байна" гэлээ.
Түүнчлэн Улаанбаатар хот руу халдвар гараагүй аймгуудаас орж ирж байгаа хүмүүсийг асуумж аван нэвтрүүлж байгаа юм. Иймд иргэд шалган нэвтрүүлэх товчоод дээр ажиллаж байгаа ажилчдын шаардлагыг биелүүлж хамтран ажиллахыг НОК-оос хүслээ.
