Өнгөрсөн тавдугаар сард иргэн Г.Ган-Очир Монгол Улсын Ерөнхийлөгчийн ээлжит сонгуулийн үеэр МАН-ын удирдах зөвлөлийн гишүүд санал хураалтын хар машиныг “луйвардаж” төрийн эрхийг хууль бусаар авсан байж болзошгүй талаар мэдээлж байв. Улмаар тухайн үед цагдаа, тагнуулын байгууллагаас түүнийг баривчилсан юм.
Тэгвэл өнөөдөр түүнийг дахин баривчилсан талаар эгч нь мэдээлсэн. Тодруулбал, тэрбээр өнөөдөр “аавынхаа гэнэтийн үхлийн талаар болон сонгуулийн хар машиныг луйвардсан талаар хэд хэдэн ноцтой мэдээллийг дэлгэнэ” хэмээн хэвлэлийн хурал зарлаад байсан юм.
Г.Ган-Очирын эгч энэ тухай “Манай дүү өчигдөр "Намайг хэвлэлийн бага хурал хийсний дараа баривчилж авч явж магадгүй" гэж хэлсэн учраас бид хамгаалах зорилготой олуулаа хоносон. Өглөө хэвлэлийн бага хурлаа хийх гээд бэлтгэх явцад дүүг маань гэрээс нь цагдаа нар Баянзүрх дүүргийн нэгдүгээр хэлтэс рүү авч явсан байна. Уг нь бид нар аавынхаа үхлийн талаар болон хэд хэдэн ноцтой зүйлсийн талаар дэлгэх гэж бүх баримтуудаа бэлэн болгосон байсан ч ийм зүйл болчихлоо" гэсэн юм.
Тэгвэл Баянзүрх дүүргийн цагдаагийн нэгдүгээр хэлтсээс “Иргэн Г.Ган-Очир нь оршин суугчдын амгалан тайван байдлыг алдагдуулж байна гэсэн гомдол ирсэн. Тиймээс тус иргэнийг эрүүлжүүлэхээр авч явсан. Хуульд заасны дагуу 24 цагийн дараа суллана” гэжээ.
