УОК-ын дарга, Монгол Улсын Шадар сайд С.Амарсайхан болон ОБЕГ-ын дарга, хошууч генерал Г.Ариунбуянаар ахлуулсан баг бүрэлдэхүүн цаг агаарын аюулт үзэгдэл тохиолдож нийт 12 сумын нутаг дэвсгэрт 186 иргэн цасан шуурганд төөрч, сураггүй алга болоод байсан Сүхбаатар аймагт ажиллалаа.
Сүхбаатар аймгийн төвөөс 50 орчим км-т байрлах Баруун-Урт сумын 8-р багийн малчин Ц.Монхорынх 1000 гаруй бог, 100 гаруй үхрээ шуурганд уруудуулж, өөрсдөө малынхаа араас автомашинтай гарсан боловч шуурганд төөрсөн байсныг Онцгой байдлын байгууллагын алба хаагчид эрэн хайх, аврах ажиллагааг цаг алдалгүй явуулж, гэрийн эзнийг эхнэр Б.Баяраагийн хамт эсэн мэнд олсон байна.
Мөн энэ сарын 22-нд зүүн аймгуудын нутаг, Сүхбаатар, Дорноговь, Дорнод, Хэнтий аймагт цасан шуурганы улмаас нийт 335 иргэн сураггүй болоод байсан бол 23-ны 17 цагийн байдлаар 334 иргэнийг олж, ар гэрт нь хүлээлгэн өгсөн бол Дорноговь аймгийн Айраг суманд алга болоод байсан нэг иргэний цогцсыг тус аймгийн ОБГ-ын алба хаагчид олсон харамсалтай мэдээ бүртгэгдлээ. Одоогоор Онцгой байдлын байгууллагад цасан шуургатай холбоотой дуудлага мэдээлэл ирээгүй байна.
