БНСУ-ын ерөнхийлөгч Юн Сок Ёол өнгөрсөн есдүгээр сард манай улсын Ерөнхийлөгч У.Хүрэлсүхтэй дээд хэмжээний уулзалт хийж, Солонгос, АНУ, Монгол Улс хоорондын зөвлөлдөх байгуулалт, найрамдалт харилцааг бэхжүүлэхээр шийдвэрлэсэн. Гэтэл яг энэ үеэр “Youngan Moja”-ийн охин компани болох “Zyle Daewoo Bus” компани манай улсад 100 орчим хуучин “Ногоон автобус” нийлүүлсэн хэрэг дуулиан дэгдээж эхэлсэн.
БНСУ-ын хэвлэл мэдээллийн хэрэгсэлд энэ сарын 26-ны өдөр мэдээлснээр, “Youngan Moja группын охин компани болох “Xail Motors" есдүгээр сарын сүүлчээр Монгол Улсад нийлүүлэх 600 гаруй автобусны 100 орчим автобусыг урьдчилан хүргэсэн байна. Гэтэл зарим автобусны будаг нь ховхорч, зэв үүсэж, төмөр хавтан гагнасан байдалтай байсан. Тээврийн хэрэгслийн дугаарыг нь хайхад 1993 оны үйлдвэрлэсэн автобусууд болох нь тогтоогдсон. Ийнхүү маргаан дэгдээж эхэлснээр Авлигатай тэмцэх газар шалгалт хийж, 21 иргэн, гадаадын дөрвөн иргэнийг баривчилсан. Асуудлын гол нь Вьетнамд угсарсан 100 орчим хуучин автобусыг тендер зарлалгүйгээр нууцаар оруулсанд байгаа юм. Үүний дагуу төрийн албан хаагчдыг авлигын хэрэгт сэжиглэн шалгаж байна” гэжээ.
БАРИМТ 1: Огт хамааралгүй гэж мэдэгдсэн "Youngan Moja" группын захирлын төрсөн хүү нь Монголд ногоон автобус нийлүүлсэн гэх "Zyle Daewoo Bus" компанийг удирддаг
Ногоон автобусуудыг Монгол руу нийлүүлсэн гэх “Zyle Daewoo Bus” компанийг 2003 онд "Youngan Moja" групп худалдаж авснаар охин компани нь болсон. Гэсэн хэдий ч "Zyle Daewoo Bus"-ийн үйлдвэрчний эвлэлийн мэдээлснээр тус компани "Youngan Moja" групп худалдаж авснаас хойш 10 орчим жилийн турш гадаадад үйлдвэр барьж, яндангийн цэвэр хэсгийг өөрийн салбар болох "Zyle Commercial Vehicles" руу шилжүүлсэн байна. "Zyle Commercial Vehicles" нь "Youngan Moja" группын дарга Бэк Сон Хакийн хоёр дахь хүү болох Бэк Бён Сүгээр удирдуулсан компани юм.
БАРИМТ 2: БНСУ-ын "Zyle daewoo bus" компанийг хаагдсаныг нуун дарагдуулж, Монголд ногоон автобусуудыг нийлүүлсэн
Улсан хот мөн "Zyle Daewoo Bus" компанид 2 тэрбум воны татаас бэлнээр төлсөн ч өнгөрсөн долдугаар сард “Үйлдвэрээ 10 жилийн хугацаанд барина” гэсэн амлалтаа биелүүлээгүй хэмээн шүүхэд нэхэмжлэл гаргасан байгаа аж. Гэсэн хэдий ч мөн оны арваннэгдүгээр сарын орчимд гүйцэтгэх захирал Бэк Бён Сү "Zyle Daewoo Bus"-ийг татан буулгаж, "Zyle Motors"-ийн гүйцэтгэх захирал нэрийн дор хөрөнгө зарж эхэлсэн байна. Одоогийн байдлаар тус компанийн дотоодын бүх охин компаниуд хаалгаа барьж, Вьетнамын компани болсон гэх мэдээлэл бий.
Харин БНСУ-ын Үйлдвэрчний эвлэлийнхэн өнгөрсөн сард хийсэн хэвлэлийн хурлаар Бэк гэр бүлийн бизнес болох "Youngan Moja" группыг хатуу шүүмжилж, “Еонган группын Бэк гэр бүлийнхэн "Daewoo Bus"-ыг хаасныг нуун дарагдуулсан” гэж мэдэгджээ. Ийнхүү "ногоон автобус"-ууд буцах эзэнгүй, буцаах хаяггүй Монголд гацчихаад байгаа аж. Цаашид дотоодод хөдөлгөөнд гаргахаас өөр аргагүй талаар ч Түгжрэлийн сайд Б.Дэлгэрсайхан мэдээлж байв.
