Авлигатай тэмцэх газрын дарга З.Дашдавааг тус албан тушаалд улираан томилох асуудлыг хэлэлцэх үеэр /2025.04.02/ УИХ-ын гишүүн Б.Энхбаяр "7.5 тэрбум төгрөгийн авлигын мөнгө сейфэндээ хадгалж байгаад баригдсан С.Батдөл ШШГЕГ-ын Богд Уулын амралтын газар ялаа эдэлж байна. Засгийн газар яагаад байгаа юм. Энийг амралтын газар амрааж байгаа хүн нь мөнгө мэддэг сайд байна гэсэн үг. Амрааж байгаа хүнээ олж шийтгээрэй" гэж хэлсэн нь олны анхаарлыг татсан.
ВИДЕО:
Тэгвэл энэ талаар Сангийн сайд Б.Жавхлангаас тодрууллаа. Тэрбээр "Ял эдэлж байгаа хүний үгээр төсөв явна гэж юу байх вэ. Хуульзүйн сайд байсан хүн надтай зэрэгцээд хоёр ч оны төсөв хамт батлалцсан хүн. 2025 оны төсвийг өнгөрсөн оны 7 сарын 25-ны өдрөөр тасалбар болгож, сайд нар төсвөө Сангийн яаманд хүргүүлдэг. Өөрөөр хэлбэл, Б.Энхбаяр сайд маань 2024 оны төсвийг бэлдээд үлдээсэн гэсэн үг. О.Алтангэрэл сайд маань учраа ч олоогүй байж байгаад төсвөө өргөн барьсан. Нэгэнт батлагдсан төсөв дээр бүх сайд нар үйл ажиллагаа явуулж байгаа. Шүүхийн шийдвэр биелүүлэх ерөнхий газар Хуульзүйн сайдын багцад багтдаг таван төсвийн ерөнхийлөн захирагчийн нэг. Төрийн тусгай албадууд нийтдээ 40 гаруй мянган алба хаагчтай. Тэдний арван хувь нь ШШГЕГ-т харьяалагддаг. Энэ жилийн ШШГЕГ-ын багц нь 214 тэрбум байгаа. 2023 оных 145 тэрбум байсан бөгөөд жилийн өмнөхөөс 40 хувь нэмэгдсэн. Ирүүлсэн санал нь үүнээс өндөр байсан. Төрийн алба хаагчдын цалин өнгөрсөн жил маш сайн нэмэгдсэн. Үүнийг дагаад энэ салбаруудын төсвийн урсгал зардал энэ хэмжээнд нэмэгдсэн. Тэгэхээр хуульзүйн сайд байсан хүн хоёр дахин нэмэгдсэн гэж намайг гүтгэж байгаа сэдвээ хүч оруулах гэж хэлж байгаа нь маш харамсалтай. Их л завтай байна гэсэн үг" гэв.
