Оросын арми Украины зүүн хэсэгт орших стратегийн ач холбогдол бүхий Константиновка хотын чиглэлд давшилтаа эрчимжүүлж, хотыг бүслэх оролдлого хийж байна гэж Украины цэргийн эх сурвалжууд мэдээлжээ. Украины цэргүүдийн мэдээлснээр, хотын зарим хэсэг “саарал бүс” болж хувирсан бөгөөд фронтын шугам тогтворгүй болж, хяналт байнга өөрчлөгдөж байгаа аж.
“Оросын бүлэглэлүүд арын шугам руу нэвтэрч байна. Хот суурин газрын нөхцөлд тэднийг илрүүлж, шахан гаргах маш хэцүү болсон” хэмээн тус бүсэд ажиллаж буй Украины нисгэгчгүй онгоцны нэгэн оператор BBC агентлагт ярьжээ.
Константиновка нь Донецк мужийн үлдсэн томоохон хамгаалалтын бүсүүд болох Краматорск, Славянск хотууд руу хүрэх гол гарцын нэг аж. Хэрэв хот Оросын хяналтад орвол Кремлийн олон жилийн турш зорьж ирсэн Донбассыг бүрэн эзлэх төлөвлөгөө бодит байдалд улам ойртоно гэж ажиглагчид үзэж байгаа аж.
Сүүлийн саруудад Украины фронтын шугам харьцангуй тогтвортой байсан ч Константиновка орчимд нөхцөл байдал эрс хурцаджээ. Оросын хүчнийхэн хотын өмнөд хэсгээс урагшилж, зарим эх сурвалжийн мэдээлснээр хотын хойд захад хүртэл харагдах болсон байна. Москвагийн зүгээс Константиновкагийн баруун өмнөд хэсэгт томоохон ахиц гаргаж, Украины зарим анги нэгтгэлийг бүсэлсэн гэж мэдэгдсэн ч Киев үүнийг няцаажээ.
Хот болон ойр орчмын хамгаалалтыг хариуцдаг Украины 19 дүгээр корпусын командлагч, бригадын генерал Александр Бакулин “нөхцөл байдал хяналтад байгаа бөгөөд дайсан зорилгодоо хүрч чадаагүй” гэж мэдэгдсэн байна. Гэсэн ч тэрээр хот дотор Оросын 130 орчим цэрэг ажиллагаа явуулж байгааг хүлээн зөвшөөрчээ.
Харин газар дээр ажиллаж буй Украины нэгэн офицер нөхцөл байдал албан ёсны мэдээллээс хавьгүй ноцтой байж болзошгүйг онцолсон байна. Нэрээ нууцлахыг хүссэн офицер, “Бид хотын дотор Оросын жижиг довтолгооны болон цэвэрлэгээний бүлгүүдтэй тулгарсаар байна. Тэд улам олон цэрэг төвлөрүүлж чадсан” гэж ярьжээ.
Шинжээчдийн үзэж буйгаар Оросын тал өмнө нь Покровск зэрэг хотуудад хэрэглэж байсан тактикаа Константиновкад давтаж байна. Энэ нь хотыг шууд дайран эзлэхээс илүүтэйгээр эргэн тойрон дахь суурин газруудыг эзэлж, хангамжийн замуудыг тасалж бүслэх стратеги юм. Сүүлийн өдрүүдэд Оросын Батлан хамгаалах яам Константиновкагийн баруун хэсгийн хэд хэдэн тосгоныг эзэлсэн гэж мэдэгдсэн бөгөөд энэ нь хотыг бүрэн бүслэх төлөвлөгөөний нэг хэсэг гэж үзэж байгаа аж.
Үүний зэрэгцээ Украины арми Оросын нутаг дэвсгэр дэх газрын тос боловсруулах үйлдвэрүүд болон Крымийг Оростой холбосон хангамжийн маршрутуудад цохилт өгсөөр байгаа юм. Үүний улмаас Крымд түлшний хомсдол үүссэн талаар Оросын томилсон орон нутгийн удирдлагууд мэдээлсэн байна.
Гэсэн ч фронтын шугам дээрх нөхцөл байдал Украины талд улам хүндрэх шинжтэй байгааг цэргийн эх сурвалжууд анхааруулж байна. Украины нисгэгчгүй онгоцны операторуудын мэдээлснээр Оросын хүчнийхэн хямд өртөгтэй нисгэгчгүй төхөөрөмжүүд ашиглан Украины байрлал, хөөргөх цэгүүдийг илрүүлэх боломжоо эрс нэмэгдүүлжээ. Мөн газрын тээврийн замууд байнгын галын дор байгаа тул сум, хүнс, техник хэрэгслийн нийлүүлэлт улам хүндрээд байгаа аж.
Украины фронтын нөхцөл байдлыг хянадаг "DeepState" төслийн шинжээчид Константиновкаг эзлэх нь “цаг хугацааны асуудал” болж хувирч болзошгүйг анхааруулжээ. Тэдний үзэж буйгаар хэрэв хот Оросын хяналтад орвол Краматорск болон Донецк муж дахь Украины үлдсэн хамгаалалтын шугамуудын логистик эрс хүндрэх бөгөөд бүс нутгийн цэргийн нөхцөл байдалд томоохон эргэлт авчрах магадлалтай байгаа аж.
Эх сурвалж: BBC
.jpg)
.jpg)
