.jpg)
АНУ-ын Нью-Йорк хот дахь Нэгдсэн Үндэстний Байгууллагын (НҮБ) төв байрны гадна өөрийгөө шатаасан төвөд гаралтай идэвхтэн хүнд түлэгдлийн улмаас нас баржээ.
ВИДЕО:
Талийгаачийг төвөдийн цагаачдын байгууллагууд Лобга Рангзен (Лобсан Палден) хэмээн мэдээлсэн байна. Тэрээр долоодугаар сарын 2-ны өдөр НҮБ-ын төв байрны үүдний ойролцоо Төвөдийн төрийн далбаа барин, Хятадын Төвөдөд хэрэгжүүлж буй бодлого, соёл, шашны эрх чөлөөний асуудлыг эсэргүүцсэн тайван жагсаалын үеэр өөрийгөө шатаажээ. Гэрчүүдийн мэдээлснээр галд автсан түүнийг хамгаалалтын алба болон онцгой байдлын ажилтнууд богино хугацаанд унтрааж, эмнэлэгт яаралтай хүргэсэн ч аврах боломжгүй байсан байна. Нью-Йоркийн цагдаагийн газар түүний нас барсныг баталжээ.
Төвөдийн идэвхтнүүдийн үзэж буйгаар тэрээр энэхүү үйлдлээрээ Төвөдөд хүний эрх, шашин шүтэх эрх чөлөө, хэл, соёлын өвийг хамгаалах асуудалд олон улсын анхаарлыг хандуулахыг зорьсон аж. Мөн энэ нь Хятадад хэрэгжиж эхэлсэн "Үндэстний эв нэгдлийн тухай" шинэ хууль болон Төвөд дэх бодлогыг эсэргүүцсэн улс төрийн эсэргүүцлийн илэрхийлэл байсан гэж мэдэгджээ. Харин БНХАУ-ын эрх баригчид Төвөд нь улсынхаа салшгүй хэсэг бөгөөд бүс нутагт эдийн засгийн хөгжил, нийгмийн тогтвортой байдлыг хангах бодлого хэрэгжүүлж байгаа гэсэн байр сууриа дахин илэрхийлсэн байна.
2009 оноос хойш Төвөд болон хөрш бүс нутгуудад Хятадын бодлогыг эсэргүүцэн өөрийгөө шатаасан 150 гаруй тохиолдол бүртгэгдээд байгаа бөгөөд ихэнхийг нь төвөд лам нар, энгийн иргэд үйлдсэн талаар хүний эрхийн байгууллагууд мэдээлдэг. Энэ удаагийн хэрэг нь олон улсын байгууллагын төв байрны өмнө гарсан цөөн тохиолдлын нэг болж, дэлхийн хэвлэл мэдээллийн анхаарлыг татаад байна.
.jpg)
.jpg)
.jpg)
