Европын Комиссын Ерөнхийлөгч Урсула фон дер Лейен Мароккогоос Испанийн Сеута хот руу өнгөрсөн долоо хоногт хэдэн арван мянган хууль бус цагаач олноор нэвтэрсэн үйл явдлын дараа Европын Холбооны гадаад хилийн хамгаалалтыг чангатгаж, гишүүн орнууд нэгдсэн арга хэмжээ авах шаардлагатай гэж мэдэгджээ.
ВИДЕО:
Испанийн эрх баригчдын мэдээлснээр, ойролцоогоор 69,500 цагаачийг Марокко руу буцаасан бөгөөд энэ нь анхны тооцооллоос 50 мянга орчмоор өндөр үзүүлэлт болжээ. Харин мөргөлдөөн, эмх замбараагүй байдлын үеэр Испанийн талд 72, Мароккогийн талд 11 хүн амиа алдсан байна. Үүссэн нөхцөл байдалтай холбогдуулан Европын Холбооны Дотоод хэргийн сайд нар өнөөдөр /2026.08.04/ яаралтай цахим хурал зарлан, цаашдын арга хэмжээг хэлэлцэхээр болжээ.
Фон дер Лейен Испанийн Ерөнхий сайд Педро Санчест илгээсэн захидалдаа Сеута дахь нөхцөл байдлыг богино хугацаанд хяналтдаа авсныг сайшаасан ч энэ үйл явдал Европын Холбооны гадаад хил хамгаалалтын тогтолцоог илүү бэхжүүлэх шаардлагатайг тод харууллаа гэж онцолсон байна.
Тэрээр "Энэ явдал бид стратегийн ач холбогдолтой хилийн бүсүүдийн хамгаалалтыг улам сайжруулах шаардлагатайг харууллаа" хэмээн мэдэгджээ. Сеутагийн нөхцөл байдал Европын Холбооны гишүүн орнуудын хооронд ч маргаан дагуулсан байна. Итали улс Испанитай холбоотой Шенгений зарим зохицуулалтыг түр хугацаанд түдгэлзүүлэх шийдвэр гаргасан бол Финланд, Дани энэ байр суурийг дэмжжээ. Харин Чехийн тухайн үеийн Ерөнхий сайд Андрей Бабиш Испанийн Шенгений бүс дэх оролцоог түр хугацаанд түдгэлзүүлэх санал хүртэл гаргасан байна.
Үүнд хариу өгсөн Испанийн Ерөнхий сайд Педро Санчес Европын зарим орны байр суурийг "ноцтой түгшүүр төрүүлж байна" хэмээн шүүмжилж, Сеута нь Шенгений бүсийн бүрэн эрхт нутаг дэвсгэр биш гэдгийг онцолсон байна. Тэрээр ихэнх гишүүн орон Испанид эв санааны нэгдэл илэрхийлсэн ч зарим улс төрийн хүчин "худал мэдээлэл, ташаа ойлголт, улс төрийн ашиг сонирхлын үүднээс" Испанийг буруутгаж байна гэж мэдэгджээ.
Фон дер Лейен мөн Европын Холбооны бүх гадаад хилийг хамгаалах нь хамтын үүрэг гэдгийг онцолж, шаардлагатай тохиолдолд хилийн биет хамгаалалтын байгууламжийг ашиглах, хяналтыг чангатгахыг уриалсан байна.
Түүний хэлснээр, Дотоод хэргийн сайд нарын цахим уулзалт нь Сеутагийн хямралаас сургамж авч, цаашдын бодлогоо тодорхойлох чухал боломж болох аж. Тэрээр хууль бус шилжилт хөдөлгөөний асуудлыг зөвхөн улс тус бүрээр биш, Европын хэмжээнд нэгдсэн бодлого, хамтын ажиллагаа, эв санааны нэгдлээр шийдвэрлэх шаардлагатайг онцолжээ.
Үүний хүрээнд тэрээр Европын Холбоог дараах таван чиглэлд хүчин чармайлтаа эрчимжүүлэхийг санал болгосон байна. Үүнд түнш орнуудтай хамтран хууль бус шилжилт хөдөлгөөнийг эх үүсвэр дээр нь бууруулах, гадаад хилийн хамгаалалтыг бэхжүүлэх, эрт сэрэмжлүүлэх тогтолцоог сайжруулах, хүн хууль бусаар хил давуулах гэмт бүлэглэлүүдтэй тэмцэх, мөн хууль бусаар нэвтэрсэн хүмүүсийг эх оронд нь буцаах ажиллагааг илүү үр дүнтэй болгох зэрэг багтсан байна.
Харин Испанийн Ерөнхий сайд Педро Санчес цагаач тээвэрлэгч бүлэглэлүүд тус улсын Дээд шүүхийн саяхны шийдвэрийг ашиглан хууль бус шилжилт хөдөлгөөнийг өөгшүүлж байна гэж мэдэгджээ. Уг шийдвэрээр далайгаар ирсэн цагаачдыг шууд албадан буцаах Засгийн газрын эрх мэдэл тодорхой хэмжээнд хязгаарлагдсан аж. Испанийн Дотоод хэргийн сайд Фернандо Гранде-Марласкагийн мэдээлснээр, Сеута дахь нөхцөл байдал одоогоор үндсэндээ хэвийн болж, далайн замаар хууль бус нэвтрэлтийг зогсоох зорилгоор усан дээр хөвдөг хамгаалалтын хаалт байгуулах ажлыг эхлүүлээд байна.
Эх сурвалж: BBC
