АНУ-ын Флорида мужийн Кейп Канавералын сансрын буудлаас “SpaceX” компанийн “Falcon 9” пуужингаар хөөрсөн “Crew Dragon Grace” хөлөг Олон улсын сансрын станцад амжилттай залгагдлаа. Уг хөлөг сансарт гарснаасаа хойш ердөө 7 цаг 55 минутын дараа ОУСС-д хүрсэн бөгөөд энэ нь АНУ-ын жолоодлогот сансрын хөлгүүдийн түүхэнд тойрог замын станцад хамгийн хурдан хүрсэн шинэ дээд амжилт болж байна.
Үүнээс өмнөх дээд амжилтыг 2020 онд “Crew-1” баг 27 цаг гаруй хугацаанд туулж тогтоож байсан бол энэ удаагийн нислэг хугацааг гурав дахин товчилж чаджээ. Уг нислэгээр гурван өөр улсын дөрвөн сансрын нисгэгч тойрог замын станцад ирсэн бөгөөд тэд ирэх зургаан сарын хугацаанд тэнд ажиллах юм. Багийн бүрэлдэхүүнд:
- Жессика Уоткинс (НАСА, АНУ): Багийн дарга, 38 настай геологич. Тэрбээр “Crew Dragon” хөлгөөр хоёр дахь удаагаа сансарт нисэж буй анхны сансрын нисгэгч.
- Люк Делэни (НАСА, АНУ): Багийн нисгэгч, 47 настай, АНУ-ын Тэнгисийн явган цэргийн хошууч асан, туршилтын нисгэгч.
- Жошуа Кутрик (Канадын сансрын агентлаг, Канад): Багийн мэргэжилтэн, 44 настай, сөнөөгч онгоцны нисгэгч.
- Сергей Тетерятников (Роскосмос, Орос): Багийн мэргэжилтэн, 37 настай, шумбагч онгоцны системийн инженер
“Crew-13” багийнхан ОУСС-д байх хугацаандаа бичил таталцлын орчныг ашиглан хүний эрүүл мэнд, анагаах ухааны салбарт чухал ач холбогдолтой дараах судалгаануудыг хийхээр төлөвлөжээ.
- Анагаах ухаан: Хүний үүсгэл үүсгэвэр эсээс (stem cell) эд эс гарган авах замаар зүрхний өвчин болон Паркинсоны өвчнийг эмчлэх шинэ арга замуудыг судалж, шинэ эм бэлдмэл туршина.
- Биологи: Сансрын гүнд урт хугацаанд аялахад шаардлагатай ургамал ургуулах автомат системийг турших бөгөөд сансрын нислэг хүний биеийн цусны эргэлтэд хэрхэн нөлөөлдөг талаарх эрүүл мэндийн туршилтуудыг үргэлжлүүлнэ.
_1729.jpg)
.jpg)
.jpg)
