Бүгд Найрамдах Ардчилсан Конго Улсын зүүн хэсэгт Эбола вирусийн халдварын сэжигтэй тохиолдолд хариу арга хэмжээ авч байсан сувилагч халдлагад өртөж амиа алдсан бол өөр нэг эмнэлгийн ажилтан хүнд шархаджээ.
Тодруулбал, ДЭМБ-ын мэдээлснээр, аравдугаар сарын 24-нд Конго улсын Тшопо мужийн Бафвасенде хотод болсон халдлагын үеэр эмнэлгийн хоёр ажилтан өртсөн байна. ДЭМБ-ын тэргүүн Тедрос Адханом Гебрейесус эрүүл мэндийн ажилтнуудын эсрэг хүчирхийллийг буруушаажээ. Энэ халдлага нь тус улсад Эболагийн тархалтыг хязгаарлахын төлөө ажиллаж буй эмнэлгийн ажилтнууд болон хариу арга хэмжээний багийнханд учирч буй аюул эрсдэл нэмэгдэж байгааг харуулж байна. Орон нутгийн иргэдийн дунд тархсан ташаа мэдээлэл, айдас болон төрийн байгууллагуудад итгэх итгэл сул байгаа нь халдварын эсрэг үйл ажиллагаанд хүндрэл учруулж байгааг олон улсын хэвлэлүүд мэдээлжээ.
АНУ-ын Өвчний хяналт, урьдчилан сэргийлэх төвийн аравдугаар сарын 23-ны байдлаарх мэдээллээр, Конго улсад Эболагийн 9,816 батлагдсан тохиолдол бүртгэгдэж, 4,757 хүн нас баржээ. Мөн Кени улсад есөн тохиолдол, хоёр нас баралт бүртгэгдсэн байна. Одоогоор Конго улсад дэгдэж буй халдвар нь Бундибугио төрлийн Эбола вирусээр үүсгэгдсэн. ДЭМБ-ын мэдээлснээр, уг вирусийн эсрэг тусгайлан зөвшөөрөгдсөн вакцин болон эмчилгээ одоогоор байхгүй байна. Үүнтэй холбоотойгоор хөрш Уганда улс аравдугаар сарын 25-наас Конго улсаас буцаж ирсэн иргэдийг 21 хоног тусгаарлах зэрэг халдвараас урьдчилан сэргийлэх арга хэмжээг чангатгажээ.
Эх сурвалж: Associated Press, Reuters
