Сар шинийн өнөө жилийн барилдааны "Цахиур хагалах бөх"-өөр Хэнтий аймгийн Өмнөдэлгэр сумын харьяат, "Хан Хэнтий аварга" дэвжээний бөх, аймгийн хурц арслан Даваасүрэнгийн Алтанцоож тодорчээ.
Улмаар түүнд "Улаанбаатар хивс" ХК-ийн удирдлагууд шагналыг гардуулсан байна. "Цахиур хагалах бөх"-ийн шагналын сан 1000 ам.доллар аж. "Улаанбаатар хивс" ХК 2003 оноос эхлэн жил бүрийн сар шинийн барилдаанд амжилттай барилдан, үзэгч түмнээ баясгасан улсын цолд ойрхон бөхийг "Цахиур хагалах бөх"-өөр шалгаруулан шагнадаг уламжлалтай. Өмнөх жилүүдэд энэ шагналыг хүртсэн бөхчүүдээс улсын дархан аварга, улсын аварга, улсын арслан тэргүүтэй 16 цолтон төрөн гарсан түүхтэй юм байна.
