АНУ-ын Хүнс, эмийн захиргаа /FDA/ энэ сарын 18 /2025.06.18/-нд Gilead Sciences компанийн боловсруулсан “Yeztugo” хэмээх урт хугацааны үр дүнтэй шинэ эмийг баталсан байна. Энэхүү эм нь ДОХ-ын халдвараас урьдчилан сэргийлэх зориулалттай бөгөөд жилд ердөө хоёр удаа тарьдаг анхны инъекцийн хэлбэртэй эм юм. Энэхүү шинэ эмийг Gilead Sciences компани 20 жилийн турш судалж, хөгжүүлсэн байна
Тодруулбал, “Yeztugo” эм нь олон улсын хоёр шатлалтай клиник туршилтыг амжилттай давсан байна. Африк тивийн эмэгтэйчүүдийг хамарсан эхний туршилтад оролцогчдын дунд нэг ч ДОХ-ын халдвар бүртгэгдээгүй бол, эрэгтэйчүүд болон транс эмэгтэйчүүдийг хамарсан туршилтад хоёр халдвар бүртгэгдэж, нийтдээ 99.9 хувийн үр дүнтэй болох нь нотлогдсон байна.
Эмийн үйлчлэл нь бие дэх вирусийн үржлийг зогсоох замаар халдвараас урьдчилан сэргийлэхэд чиглэсэн бөгөөд хэрэглэгч жилд хоёр удаа инъекц тариулахад хангалттай аж. "Gilead" компанийн мэдэгдэлд дурдсанаар АНУ-д анхны нийлүүлэлт 2025 оны сүүлчээр эхэлж, улмаар Европ, Латин Америк, Ази, Африк зэрэг бүс нутгуудад өргөжүүлэхээр төлөвлөжээ.
"Gilead" Sciences-ийн Ерөнхийлөгч Жоанн Стокуэлл, “Yeztugo бол ДОХ-ын халдварын эрсдэл өндөртэй хүмүүсийг хамгаалахад хувьсгал авчирсан алхам юм. Энэхүү шинэ хэрэгсэл нь халдвараас сэргийлэх илүү хүртээмжтэй, урт хугацааны шийдэл болж байна” гэжээ.
АНУ-ын Хүнс, эмийн захиргаа энэхүү эмийг 18-аас дээш насны, ДОХ-ын халдвар авах өндөр эрсдэлтэй хүмүүсийн хэрэглээнд зориулан баталсан бөгөөд эмийн хэрэглэх заавар, эмчийн хяналт дор хэрэглэгдэх нөхцөлтэйгээр нийлүүлэгдэх ажээ.
Эх сурвалж: Time.com
