Нийслэлийн Баянзүрх дүүргийн XVII хорооны XXI худгаас авсан усанд мөнгөн ус илэрчээ. Энэ сарын 18-ны орой хоёр айлын хэрэглэсэн уснаас мөнгөн ус илэрсэн байна.
Тухайн айлуудын уснаас нийт 5-8 грамм мөнгөн ус ялган авч, лабораторийн шинжилгээнд өгчээ. Мөнгөн ус илэрсэн хоёр айлын 10 гаруй хүний дунд 6-7 сартай жирэмсэн хоёр эмэгтэй, бага насны хүүхдүүд байгаа бөгөөд эмнэлэгт хэвтүүлэн хордлого тайлах эмчилгээ хийж байгаа аж. Уг худаг Ус сувгийн удирдах газрын төвлөрсөн шугамд холбогдсон бөгөөд УСУГ-аас худгийн уснаас мөнгөн ус илрэх боломжгүй гэж үзэж байгаа юм. Иймд мөнгөн ус ундны усанд ямар замаар орсныг цагдаа, тагнуулын байгууллагууд хамтран шалгаж байна.