Өнөөдрийн /20189.06.19/ Засгийн газрын хуралдаанаар Б.Ганбатыг ЗГХЭГ-ын Тэргүүн дэд даргын үүрэг гүйцэтгэгчээр томиллоо.
ЗГХЭГ-ын Тэргүүн дэд дарга Г.Баясгалан Үндсэн хуулийн цэцийн гишүүнээр сонгогдсонтой холбогдуулан, уг албан тушаалд нөхөн томилгоо хийх шаардлага үүссэн. ЗГХЭГ-ын Тэргүүн дэд даргад ТӨБЗГ-ын даргын үүрэг гүйцэтгэгч Б.Ганбат, МАН-ын Хяналтын хорооны дарга Д.Батбаатар, Барилга хот байгуулалтын ТНБД С.Магнайсүрэн нарын нэр яригдаж байв.
Б.Ганбатыг Хууль зүй, дотоод хэргийн сайд Ц.Нямдоржийн “зүтгүүлсэн” гэгдэж байлаа. Тэрбээр өнгөрсөн долоо хоногт ЗГХЭГ-ын Тэргүүн дэд даргад нэр дэвшихтэй холбогдох материалуудаа Төрийн албаны зөвлөл болон АТГ-т хүргүүлэн шалгуулахад, “асуудалгүй” гэж үзэж, ийнхүү томилогдсон байна.
Б.Ганбат хуульч мэргэжилтэй. ОХУ-ын Дотоод явдлын яамны академи, Лондонгийн их сургуулийн хуулийн коллеж төгссөн. 1990-1995 онд Дорноговь аймаг, Баянгол дүүргийн цагдаагийн хэлтэст төлөөлөгч, мөрдөн байцаагч, 1995-2013 онд Сангийн яамны хуулийн хэлтэст мэргэжилтэн, ахлах мэргэжилтэн, хэлтсийн дарга, орлогч дарга, газрын дарга, 2013-2014 онд Дэлхийн банкны төсөлд шинжээч, 2014-2016 онд өмгөөлөгч, 2016 онд Засгийн газрын Хэрэг эрхлэх газрын Хяналт, шинжилгээ, үнэлгээ, дотоод аудитын газрын дарга, мөн оны наймдугаар сараас Монголбанкны Хууль, эрх зүйн газрын даргаар, 2018 оны 12-р сараас ТӨБЗГ-ын даргын үүрэг гүйцэтгэгчээр ажиллаж байжээ.
